Gabaygaan waxaa tiriyay, Alaha u naxariistee abwaan Cabdiqaadir Xirsi yamyam, waxaana gabaygaan la oran karaa wuxuu kaalinta kowaad oga jiraa suugaanta soomaalida, waxaa abwaanku aad ugu fogaaday oo tilmaan fiican ka bixinayaa hiddaha iyo dhaqanka soomaaalida, iyo asalka qowmiyeed halka ay ka soo jeedaan. Wuxuu abwaanka aad u cabiray in dadka soomaaliyeed ay yihiin dad uu ilaahay ku manaystay hiddo iyo dhaqan aad u qurux badan.

Waxaa dad fara badan ay isweydiiyaan, su’aasha ah soomaalidu asalkooda halka ay  ka soo jeedaan? Hase yeeshee abwaan yam-yam wuxuu gabaygiisa ku xusayaa, In soomaalidu ay tahay bulshada dunida ugu faca weyn, dhinaca kale wuxuu abwaanku gabaygiisa ku xusuyaa in soomaalidu ay ka hareen faraaciinadii hore  oo lagu tiriyo qowmiyad aad u fac weyn.

Abwaan yam-yam alaha u naxariistee ayaa isagu  hibo u lahaa suugaanta oo uu  markuu doono tirin jiray, waxaase uu abwaaniin badan kaga duwanaa isagoo mar walba ku faani jiray hiddaha iyo dhaqankiisa, waxaana uu gabayadiisa iyo suugaantiisa ay intooda badan ahaayeen WADDANI, wuxuu mar walba ku faani jiray in dadka soomaaliyeed ay yihiin bulshada ugu saraysa dunidda. Waxaa dad fara badan ay ku xusuusan karaan heesta caanka ah ee ay ku luqayn jireen hobalada iftiin ee SOOMAALI BAAN AHAY!.

 Ugu dambayn waxaa gabaygaan uu wax wayn u tari doonaa jiilasha yar-yar ee soo koraya in ay wax ka bartaan hidahooda iyo dhaqankooda qaalliga ah oo qaab suugaaneed loo cabirayo.

Wuxuuna ku bilaabay sidatan:- 

Dadka waw

gu’weynahay                                                                                                                   

Guun soo jiraan ahay

Nuux iyo gadaashii

Duufaan ka guurkii

Baddii jiidhay gabiyada

Dhulkii giigsanaan jiray

Meeshuu ku kala go,ay

Gardafey ha noqotee

Weli goobti baan naal

Caddaankiyo guduudkaba

Waan kala gurracannahay

Muuqaalka guud iyo

Dhaqamada is geli kara

Canfartaan gudboonahay

Isku gibilna waan nahay

Oramada iyo gaallaha

Ayaan gacalwadaagnaa;

Mahad aan go,ay iyo

Gallad eebahaa lehe

Giddigood Rasuuladi

Uu geyiga usoo diray

Ninba diin u gooniya

Hala gola yimaadee

Isu soo gurkoodii

Tii geba-gebaysiyo

Gudhiggii kitaabada

Markii la isu geeyiyo

Guddoonshihii Ambiyadiyo

Waxaan haysanaa gacan

Geesigay ku taalla

Guusha magacyadeedyo

Yahay furaha lagu galo

Albaabada Janada guud

Oo aan nin garab maray

Gadan Karin muftaax kale

Muslim baanu nahay garo

U gudbiya walaalaha

Gudashada wanaaggoo

Guud ahaanna uga diga

Fal xumaato geli kara

Geerida iyo dhimashada

Yaasiinkaan qofkii go,a

Ku gunaanadnaayoo

Ikhlaas lagu guneeyaa

Godka lagula hooyaa;

Marka qaranba goonidi

Afrikada lakala guro

Bulshada geeska bari xiga

Ku gadaaman baa nahay;

Qaran iyo gob baanahay

Lixdankii gumeysiga

Gacantiisa kala baxay

Calan midab u gaariyo

Sumadda lagu gartaa tahay

Xiddigtaa shan geeska ah

Geysh noo ilaashiyo

Geesi uu gu dhaartoo

Gabbashada ka caagiyo

Gabyaa baanu leenahay

Markay goob dagaal tahay

Guubaabada ku caanoo

Geeraarkiisa fulayada

Dhex galaan cadaawaha

Gaadiid baanu leenahay

Gurgurshaanu raranaa

Hadba waanu guurnaa

Deyrtiyo gugii baan

Hadba meeshi geeda leh

Cosobkooda guranaa

Gadaal looma sahanshee

Galbeed baan u soconaa

Goobaha barwaaqaa

Lo,da geeska weyn iyo

Ari nooga goohaa

Dhitadiyo garoorkaan

Gocayada ku shubanaa

Ningixaa la giijaa

Gaaridu ku heestaa

Burcadkaa ka soo go,a

Digsaa lagu guraayoo

Galabtii la shiilaa

Caanooyada ma gaarnee

Sixinkaanu gadanaa

Ama keyd la geliyaa

Goosaar ka dhigannaa

Geelbaanu dhaqannaa

Gaawaan u culannaa

Gaaxdaan ka maalnaa

Marna dhinaca guurkaan

Gabadhii jacayl mudan

Yarad loogu geeyaa

Gaafkiyo arooskana

Ciyaarbaan gingimannaa

Gabladaannu tumannaa

Dudadoodhan geesbaa

Aqal loogu gooyaa;

Guri baannu leenahay

U eg maabka guudoo

Aan dunida laga garan

Marka rarada laga guro

Xarragada gammaankiyo

Geenyaanu fuulnaa

Warmahaan gingimannaa

Garawshaha xishoodkaan

Baal dahaba gelinnaa

Martida gaajo haysoo

Gasiin kale an loo hayn

Ayaa waajib gudashada

Hasha geela ka irmaan

Loo gowracaayoo

Gole loo dugsiiyaa

Hilbaha loogu geeyaa

Odayada gaboobiyo

Intii garasho dheer iyo

Guud ahaanba culimada

Gaarbaa loo xurmeeyaa.

Go, cad baannu xirannaa

Gammuun baannu qorannaa

Gabooyaha la geliyaa

Golxab baannu tummannaa

Gaashaan baan yagleellaa

Kabo feygamuuraan

Gocandhada ka sidannaa

Geed baa la waabaa

Gogol baa la fidiyaa

Guurti lagu casuumaa

Gar kastoo adayg badan

Way tala gorfeeyaan

Go’aankoodu waa xeer

Dhibta soo gunaanada

Marka dhiig la kala galo!

Daqar iyo qur gooyana

Culimada garsoorkiyo

Diintay u gudubtaa

Xaqaa lagu guddoonshaa !

Mirahaannu gurannaa

Gocasaannu qodannaa

Hangoolka iyo gudintaan

Geedaha ku jarannaa

Sisintiyo geleydiyo

Geedkastoo khudaaraan

Midba gees ku beeraa

Xiliyada la goostaa

Ceel kastoo gundheerbaa

Biyihiisa gaarnaa

Abaarta uga gudubnaa

Dembi geleddii Qaabiil

Bankii geeriyaadoo

Haabiil markuu go,ay

Dhirta qodaxda guratiyo

Taariikh ma garatooy

Godkii ugu horreeyee

Ina aadan galaybaan

Geesihiisa weli naal!

Tilmaanyeydu waa gaar

Gobolkeygu waa caan

Nin ahraamta galeybaa

Garta raadka dadkeygee

Faraaciinadii gudubtiyo

Masar jiilashii galay

Inaan goobta oga haray

Goggaa yaqaaanoow

Gabar timaha dabatiyo

Gudniinkii la toli jiray

Waa dhaxal aan guurine

Weli geeska yaaloo

Bulshadaan u gaaree

Diiwaanka noo geli!!!.

Waxaa soo diyaaariyay

Daahir Faarax  Afdheere.
Email:-gulan1969@yahoo.co.uk