Kaddib markii diyaarado aanan la aqoon cidda iska leh ay maalintii shalay duqeyn arxan daro ah ka geysteen xaro Qaxooti oo ku taala duleedka Degmada Ceelcade ayay qaar Shabakadaha ay maamulaan Soomaalida arrintaas siyaabo kala duwan wax uga qoreen.

Qaar baa dhacdadaas usoo tabiyay si ay mas’uuliyadi ku jirto, isla markaana waafaqsan nidaamka warbaahinta, kuwaasoo baaritaan ay sameeyeen kusoo ogaaday in diyaaradaha wax duqeeyay ay bartilmaameedsadeen xaro Qaxooti oo ay dad shacab ah ku sugan yihiin, halka shabakadaha qaarna ayaga oo aanan waxba hubsan ay duqeyntaasi ku tilmaameen in ay aheyd mid lala beegsaday saldhigyo ay Al-shabaab ku leeyihiin duleedka Ceelcade.

Waxaa kale oo jirta in qaar saxaafadda Soomaaliyeed ka mid ah ay arrintaan si weyn uga been abuurteen Maxamed Cabdi Kaliil oo ah Guddoomiyaha gobolka Gedo, ayaga oo sheegay in uu yiri “Diyaaradaha wax duqeeyay waxay bartilmaameedsadeen xarumo ay Alshabaab ku leeyihiin Degmada Ceelcade.”

Haddaba, mar ay maanta shabakadda AOL qad Teleefan kula xariirtay ayaa waxuu arrimaha laga sheegay ku tilmaamay borobogaan raqiis ah oo aan sal iyo raad toona laheyn.  “Anigu waxaan sheegay in diyaaradaha duqeynta geystay ay si qalad ah u weerareen dad masaakiin ah oo ku jira xaro Qaxooti oo Degmada Ceeccade ku yaala, weerarkaasna ay waxyeelo dhimasho iyo dhaawacba leh kasoo gaartay dad shacab ah oo aanan waxba geysan, waana ka xumahay dhibaatada halkaas ka dhacday” ayuu yiri Kaliil.

Gudoomiyaha Gobolka Gedo oo hadalkiisa sii wata ayaa waxaa kale oo uu yiri “Wax qarsoon ma ahan in aan dagaal qaraar kula jirno kooxaha nabad-diidka ah ee Al-shabaab, laakiin ma ogolin raalina kama nihin in deegaanada ay degan yihiin dadka shacabka ah la weeraro dhibaatana loo geysto.”

Dib waxaan kasoo gudbin doonaa wareysiga Maxamed Cabdi Kaliil oo maqal ah.

Masawirkani waa Nabadoon Maxamed Axmed Faarax (Indhayare) oo ka mid ah Nabadoonada beesha Sade ee gobolka Gedo oo ah goob-jooge ka war-bixinaya qaabkii ay diyaaradaha u duqeeyeen xarada Qaxootiga ee Degmada Ceelcade.

    Halkaan ka dhageyso wareysi cusub oo laga qaaday Nabadoon Maxamed Axmed Faarax (Indhayare) oo goob joog ka ahaa markii ay diyaaradaha duqeynayeen xarada Qaxootiga ee ku taal Degmada Ceelcade.

   Halkaan ka dhageyso wareysigii hore ee Nabadoon Maxamed Axmed Faarax (Indho yare)

————-
Mohamed Sujuu, Nairobi/Kenya.