Maxamed Cabdi Kaliil oo ah Gudoomiyaha gobolka Gedo oo maanta u waramay Shabakadaha Allgedo iyo Gedoweb ayaa sheegay in uu aad uga xun yahay duqeyntii ay diyaaradaha Kenya u geysteen Xaro Qaxooti oo ku taal duleedka Degmada Ceelcade ee gobolka Gedo.

Kaliil ayaa waxuu yiri “Waan ka xumahay weerarka waxashnimada leh ee ay diyaaradaha dagaalka ee Kenya la beegsadeen dad shacab ah, waxaana uga tacsiyeeyneynaa qaraabadii dadka ay waxyeelada kasoo gaartay duqeyntaas iyo shacabka Soomaaliyeedba.”

Guddoomiye Kaliil ayaa waxaa kale oo uu been abuur iyo waxba kama jiraan ku tilmaamay warar ay maalmihii lasoo dhaafay faafiyeen qaar ka mid ah shabakadaha Soomaalida, kuwaasoo sheegayay in Guddoomiye Kaliil uu yiri “diyaaradaha dagaalka waxay weerareen saldhigyo ay Alshabaab ku leeyihiin deegaanka Ceelcade.”

“Wixii been abuur ah cidii sameysay baan koley kala xisaabtami doonaa.  Saldhigyada ciidan ee Shabaab iyo meelaha ay degan yihiin wax mugdi nooga jira ma ahan, diyaaradahana meelahii loogu tala galay ma aanay weerarin oo yoolkoodii in uu qaldanaana waan sheegnay.  Marka intaas waxii aan aheyn cidii sheegtay ama si qaldan wax u duubtay nidaam lagula xisaabtamo ayaa jira oo aan kula xisaabtami doonaa haddii uu Rabbi idmo” ayuu yiri Kaliil. 

   Halkaan ka dhageyso wareysiga Kaliil oo dhan

Waraysigaan waxaa si wadajir goob joog u ahaa Shabakadaha Gedoweb iyo Allgedo.