Diyaarad nooca qumaatiga u kaca ee la rumeysan yahay in laga leeyahay Dalka Kenya ayaa abaare 2:30 kii galabnimo waxay duqeyn dhinaca cirka ah ay ka geysatey gudaha Magaalada Baardheere, gaar ahaan guri ku yaala Suuq yare ku yaala agagaarka buundada, iyadoo duqeyntaasina ay wax yeelo ka soo gaartey khasaaro hal qoys oo ka ag dhowaa goobtii lala beegsanayey gantaalada ay tuuraysey Diyaaradaasi.Duqeyntani ayaa waxaa si xun ugu dhaawacmey labo gabdhood oo walaalo ah, islamarkaana caruur ah uuna dhaley aabe lagu magacaabo Kaliil kana mid ah dadka danyarta ah ee dulaaleyda ah ee ka shaqeysta Suuqa Xoolaha.

Xaalada Caafimaad ee labadaasi caruurta ah oo mid ka mid ah xaaladiisu ay liidato ayaa iminka waxaa lagu daweynyaa rugo Caafimaad oo ku yaala gudaha Magaalada Baardheere, iyadoo dhaawacyada soo gaaray labadaasi caruurta ahna ay ugu daran yihiin firir ka Gantaalada diyaarada oo maskaxda iyo qeyba kale ee jirka ah ka galey.

Labadii maalmood ee u dambeeyey dadweynaha ku dhaqan Magaalada Baardheere waxaa ay dareemayeen guuxa diyaaradaha oo maalin iyo habeenba dul heehaabaya hawada sare, taasoo dad badana ku abuurtey walwal xoogan, iyadoo dadkuna ay cabsi xoogan.

Ma ahan markii ugu horeysay oo duqeymo diyaaradeed noocani oo kale ah lala eegto gudaha magaalada Baardheere, islamarkaana ay wax ku noqdaan dad rayid ah, bartamahii sanadkii la soo dhaafey ayey ahayd, markii 3 maalin oo isku xiga duqeymo sababay dhimasho iyo dhaawac ay ka dhaceen gudaha Magaalada Baardheere.

————
Axmed Cumar Saalixi, Baardheere/Gedo.