Gariley, Gedo/Somalia (AOL) - Biya la’aanta soo food saaratay deegaanka garileey oo u dhaw xadka Somaliya iyo Kenya isla markaana ka tirsan Deg. Baardheere ee Gobolka Gedo ayaa timid kaddib markii ay gureen ceel biyoodyada iyo warihii ku yiilay deegaankaasi taasoo maalmihii ugu danbeeysay ay dhibaatoyin kala kulmayeen dadka iyo duunyada deegaankaasi ku dhaqan.

Gudoomiyaha Deegaanka Garileey - Cismaan Faniin Buulle ayaa sheegay in dhibaatooyinka ka dhashay deegaanka ay sababtay in dadka iyo duunyadaba ay  isaga hayaamaan deegaankaas iyagoo beegsanaya halka uu Roob ka da’ay waxaana uu sidoo kale tilmaamy in deegaanda ka ag dhaw halkaasi ayan wax roob ah ka di’in sanadihii ugu dan beeyay.

Gudoomiyaha deegaanka Garileey ayaa intaa raaciyay in biyaha kaliya ee laga isticmaalo deegaankaasi ay ka yimaadaan deegaank wajeer ee gobolka woqooyi Bari ee dalka keenya oo booyado looga keeno iyadoo fuustadii biyaha ahna ay ka joogto 100 kun Shilling Somali ah, tasoo dadka intooda badani ayan awoodin in ay gataan Biyahaasi.

Ma’ahan oo kaliya deegaanada ay biyo la’aantu saameeyasay Garileey ee waxaa jira deegaano kale oo ay ka mid yihiin Fax Fax-dhuun, Siidimo, Kantama iyo deegaano kale oo ka tirsan degamada Baardheere ee Gobolka Gedo.

Mas'uuliyiinta deeganadaasi ayaa ugu baaqay in Hay’adaha samafalka iyo dowalada Somalia ay ka baaraan degaan sidii ceel biyood loogu qodi lahaa deegaanadaasi si looga gashaanto dhibaatooyin ka dhasha biyo la’aanta iminka jirta.

Axmed Cumar Saalixi, Baardheere-Gedo.



Allgedo News Media Network
allgedo@allgedo.com