|
|
Allgedo News, May
31, 2008
|
Dhacdo
la yaab leh!
Gabdhaha Aqoonta leh ee dalka
Masar waxaa lagu yiqiin waayadii
hore in ay xushaan oo guursadaan
Ragga Dhallinyarada ah, aqoonta
leh ee iyaga u dhigma, lana
da'da ah, kana soo wada-baxeen
Jaamacado, amaba wata Tacliin
tooda ka sii sarraysa.
Laakinse, tirakoob la sameeyay
dhowaan ayaa waxay soo ban-dhigtay
arrin taas ka duwan oo ah
gabdhihii aqoonta lahaa ee
Jamacadaha ka soo qalin-jebiyay
in ay si xoog leh ugu
qamaamayaan guursiga Odayaasha
da'da ah, Hantiilayaasha ah,
aadkana ay u hooseyso aqoontoodu,
ha ahaadeen Masaari amaba dalal
kale ha u dhasheene. Waxaa
shardi ah oo kaliya inuu Odaygu
yahay "HANTIILE AQOON-YAR".
Daraasaddan oo Casri ah oo ay
soo bandhigtay Wasaaradda
Garsoorka ee dalka Masar ayaa
waxay muujinaysaa in 200-kun oo
hablood (Gabdho) oo Masaari ah,
kana soo qalin-jebiyay
jaamacadaha kala duwan ee
dalkaas, amaba Shahaadooyin sare
ka wata dalalka kale ee dibadda
in ay guursadeen dhowaanahan
Odayaal Beesa badan leh oo ay
badankood yihiin Jaahiliin.
Tallaabadan la yaabka leh ee ay
ku dhaqaaqayaan hablaha
Masaarida ayaa lagu fasiray in
ay tahay mid ay hablahaasu kaga
hor-tagayaan oo kula
dagaalamayaan shaqo la'aanta
baahsan, saboolnimada jirta iyo
guumaysnimo isa soo taraysa oo
si joogta ah ula soo derista
Hablaha Masaarida.
Daraasaddan ayaa waxay
raacinaysaa intaas in is-guursiga
noocan oo kale ahi ee danaha
gaarka ah laga leeyahay, aanna
ku dhisnayn "JACAYL", uu
badanaaba ku dhammaado is-furid
deg-deg ah iyo burbur qoyseed.
Sababta uu furriinka deg-degga
ahi u yimaado ayay ragga wax-darsaa
ku sheegeen isu-dhignaan
la'aanta labada is-guursatay ee
dhinacyada fikirka, aqoonta,
Seykolojiyadda, baahida
isu-galmoodka iyo dhinacyo
kaleba.
Inkastoo ay sababuhu kuwaas ka
mid yihiin, waxaa haddana ka mid
noqon kara-sida ay Soomaalidu
tiraahdo-"Muraadkiisa kaa hele,
meel dheer ayuu kaa maraa"...!!
W/D:- Muxyaddiin M.Kaalmoy
kalmoi@hotmail.com
|
 |
|
|
|
|
|
