Gudoomiyaha Shirweynaha Columbus, Ohio oo faahfaahin ka bixiyey Ujeedooyinka Shirka iyo Qodobada looga hadli doono


Baardheere, Cabdi Nuur Sh.C/salaan Aw- Maxamuud oo ah Gudoomiyaha Shirweynaha Qurbajooga Beesha Sade uga furmaya Colombus,Ohio ayaa markii horeysay waxaa uu ka warbixyey ujeedooyinka loo qabtey iyo Qodobada looga hadli doono oo uu ku sheegay in dadku ay is abaabulaan, danoohadana ay u midoobaan, maalkooda iyo muruqoodana ay isu geeyaan, si ay wax taraan dadka kale walaalahooda ah ee ku sugan Gudaha dalka Soomaaliya.
 
Cabdinuur Sheekh C/salaan oo Saaka Wareysi dheer siiyey Idaacada Markabley ee Magaalada Baardheere, isagoo ku sugan Magaalada Columbus ee Cariga Mareykanka ayaa wuxuu sheegay in shirkani uu yahay kii ugu horeeyey oo isugu yimaadaan Qurba jooga, dadka ka qeyb galaya ayuu tilmaamay in ay ka kala imaanayaan qaaradaha kale gedisan ee dunida,waxuuna sheegay in inta badan ergooyinkii ka qeyb geli lahaa Shirka oo socn doona ilaa 4 maalin in haatanba ay ku sugan yihiin Goobta shirka.
 
Mar aan wax ka weydiinay Gudoomiyaha Shirweynaha Qurba jooga Beesha SADE Cabdi Nuur in shirka lagu soo qaadi doono sidii loo dar dar gelin lahaa dadaalada nabada ee ka soconayey dhowaanahan Gobolka Gedo ayuu ku jawaabay in wax walba ay ku xirnaan doonta marka laysu yimaado oo danaha guud laga hadlo qodobada ajendayaasha ah,wayna dhici kartaa ayuu yiri in Qodobkaasi laga wada hadlo.
 
Sidoo kale Mar aan Cabdi Nuur wax ka weydiinay sida uu u arko Khilaafka ku saabsan shirka oo qaar ka mid ah Qurba jooga ay ku kala aragti duwan yihiin ayaa waxaa uu qirey in ay jiraan shaqsiyaad iyagu fakir kale qaba oo aaminsan in shirka dib loo dhigo, dadka dooda ka qaba arinkaasina ma badan ayuu yiri, waxaana rajeynayaa in maalmaha soo socda ay ku soo biiri doonaan shirka .
 
Qabsoomida shirkani iyo dhaqaalaha ku baxaya ayuu sheegay inaysan jirin Dowlad ama hay,ada ka saacidey Qabsoomida shirka ,Shirkana waa tabarucaad oo Shaqsi weliba isaga ayaa iska bixiyey ayuu yiri kharashka ,shirkani ma ahan ayuu yiri mid siyaasadeed ama ujeedooyin gaar ah mid laga leeyahay, ujeedadu waa sidii Qurba jooga ay u yeelan lahayeen mowqif mideysan iyo isku xirnaan.
 
Gudoomiyaha Shirweynaha Cabdi nuur oo ka jawaabayey su,aal ahayd eedaha had iyo jeer loo soo jeediyo Qurba jooga beesha in ay ka gaabiyeen wax u qabashada deegaanada ay ka soo jeedaan marka laga eego dhinacyada Nabadeynta iyo Horomarinta Adeegyada Bulshada,ayaa waxaa uu yiri sababaha loo abaabuleyba shirkani arimahaasi ayaa ugu muhiimsanaa,waxaana ugu baaqayaa dadka soo jeediyey dhaliilahaasi in ay ka dhur sugaan Natiijooyinka ka soo bixi doona Shirweynaha.
 
Hadalka Cabdi Nuur ayaa waxuu ku soo beegmayaa xilli maanta lagu wado in Magaalada Columbus, uu shirweyne uu uga furmo ergooyin ka kala socda Qurba jooga Beesha SADE,iyadoo shirkaasina dadka ku dhaqan Gobolka Gedo ay si weyn uga dhur sugayaan waxa ka soo bixi doona shirweynahaasi.

 
Axmed Cumar Salixi, Baardheere/Gedo.
 

Allgedo News Media Network
allgedo@allgedo.com





 

                            Allgedo  Online © 2006 - All Rights Reserved.                        
 Contact us at: allgedo@allgedo.com