Columbus, Ohio (AOL) - Kulan balaaran oo khadka Telephone ka ah ayaa Axaddii  05/04/08 dhexmaray Guddoomiyaha Cusub ee gobolka Gedo Mudane Xusseen Sh. Cabdi (Farey) iyo Aqoon yahano iyo wax garad ka mid ah jaaliyadda reer Gedo ee qurbaha. Ujeedada kulan-khadeedkaan ayaa ahayd in loo  hambalyeeyo maamulka cusub iyo wada tashi guud. Ka soo qaybgalayaasha shirka ayaa waxaa ka mid ahaa xubna badan oo ka mid ah Hay’adda Somali Development Foundation.

Waxaa shirka furay  Prof. Warsame H. Ali oo shir guddoonka ahaa. Salaan iyo tahniyad ka dib, wuxuu ku soo dhoweeyey goobta guddoomiye Fareey. Aqbalitaan iyo ajiibid ka dib, guddoomiyaha wuxuu si kooban u qeexay qorshiisa uu doonayo in uu gobalka ku maareeyo isaga oo ku nuux-nuuxsada sida ay uga go’an tahay in uu mudnaanta koobaad siin doono dhamaasha tirka maamulka gobalka: Sida howl galinta police-ka iyo soo celinta amaanka. Sidoo kale wuxuu sheegay guddomiyuhu in uu diiradda saari doono dib u heshiisiin qotta dheer, is cafis iyo in loo dhaqaaqo tubta hor umarka.

Hadalkaa kooban ee guddoomiyaha ka dib, waxaa loo gudbay in la waydiiyo su’aalo iyo in uu ka jawaabo. Su’aalahaan ayaa u badnaa kuwo la xariiro habka uu doonayo guddoomiyaha in uu wax u maareeyo, cidda uu xariirka la yeeelanayo, cidda uu caawinta ka doonayo. Dhamaan su’aalihii wuxuu uga jawaabay si aad looga maqsuuday oo ay ku dheehan tahay aqoon, waayo aragnimo, dagganaasho iyo daacadnimo.

Su’aalaha ka dib, waxaa loo gudbay talooyin aad muhiim u ahaa oo loo gudbinayay Guddoomiyaha kuwaas oo ay aqoonyahnnada iyo wax garadku ku xeel dheeraadeen. Waxay cabireen aragtidooda ku aaddan sidii ay Gedo uga gudbi lahayd marxaladda ay manta taal. Sidoo kale, waxay u ballan qaadeen wada shaqayn dhinac walba ah iyo xariir joogta ah.

Guud ahaan shirka ayaa wuxuu ahaa min billow ilaa dhamaad mid aad u daggan una xiisa badan. Hadalkii koobnaa iyo jawaabihii ayaa waxay ahaayeen kuwo ay wax garadku aad uga maqsuudeen, kordhisayna taageerada ay u hayeen maamulka cusub ee Gedo.  

Ugu dambayntii, waxuxuu guddoomiyaha codsaday in la abuuro guddi maamulka u qaabilsan xariirka dibadda taas oo dib loogu balamay.

 

Mohamud H. Elmi, Columbus, Ohio.