(Qaybta 1-aad)


Mahdi waxaa uu ahaa Arday aad u Akhlaaq wanaagsan, waxabarashadana ku fiicnaa; sannad kastana waxaa uu kaalinta 1-aad ka gali jiray isu-geynta dhibcooyinka Ardadii ay isku fasalka ahaayeen.

Ardaygani wuxuu ka soo jeeday Qoys Soomaalida Beeralayda ah, oo weliba ehelu-ddiin ah, hanti la sheegaase aanan lahayn.

Mahdi waxaa ay isku Xaafad ahaayeen 'Muna' oo iyadu Ardayad Dugsi kale dhigata ahayd, fasalkeeduna uu ka hooseeyay kii uu Mahdi dhiganayay.

Gabadhu waxay ka soo jeedday asal-ahaan qoys Xoolaley ah. Aabbaheed Meygaag ayaa isaguna ahaa Sheekh weyn oo Cilmiga Diinta looga dambeeyay.

Muna Allahii abuuray waa uu u dhameeyay quruxda muuqata iyo tan qarsoon intaba, hase yeeshee, dhanka Waxbarashada Dugsiga ayay ku liidatay, taasna waxaa ay ku kalliftay in ay ku fekerto cid kale oo galbihii ama fiidyadii dib ugu naqtiimisa casharradii loo soo dhigayay subaxyadii.

Sidaas darteed ayay Muna danku ku kalliftay in ay Mahdi oo ay is-yaqaanneen ka codsato inuu ka gacan-qabto u naqtiiminta maaddooyinka qaarkood, xilli loo tafa-xeydanayay Imtixaanno soo wajahnaa.  Codsigaas oo uu Mahdina oggolaaday, soona dhoweeyay.

Muna waxaa ay ku qasbanaatay- illayn Dani ninkeed ka adage-in ay Mahdi galab kastaa ugu timaado Aqalkooda, lana fariisato gudaha qolkiisii yaraa, ee isaga u goonnida ahaa.

Imaatinkii joogtada ahaa, ee ay Muna ku imaaneysay, kuna raageysay Aqalka Mahdi, wuxuu iska ahaa mid caadi ah, oo ay waalidiintoodu ku kalsoonaayeen, kana shakinayn, waayo, Mahdi Aabbihiis Muuse ayaa wuxuuba ka mid ahaa xerta Cilmiga ka kororsata Muna Aabbaheed Sheekh-Maygaag.  Xiriir wanaagsan iyo is-xushmayan guudna waa uu ka dhaxeeyay labada qoys.

Markii ay Muna timaado Aqalka Mahdi,aad ayaa loo soo wada dhoweyn jiray,loona qaddarin jiray.  Waxaa ugu darneyd Mahdi hooyadiis 'Maleyko' oo la soo boodi jirtay erayo ay ka mid ahaayeen:- "Ina-Sheekhey soo dhowow, fariiso...u keena Shaah-Casiriyo ah, Daangawiis iyo weliba Daango" iwm.

Xiriirka Mahdi iyo Muna wuxuu ku salaysnaa xiriirkaas guud ee labada qoys, dabadeedna wuxuu ku sii xoogeystay iskaashiga xagga duruusta.

Duruus isu-akhrintii u dhaxaysay Mahdi iyo Muna, waxaa si lama filaan ah uga soo hoos-dusay "Jacayl kulul" kaas oo labada dhinacba hareeyay, walow, ay Muna ayan toos ugu dhawaaqi jirin:"Waan ku jeclahay"- illayn waa haweene-waxayse bilowgii hore ku war-wareegi jirtay erayo ka turjumaya Jacayl oo ay ka mid ahaayeen:- "Ag-jooggaaga waan ka helaa", "Marna kuma moogaan karayo". "Had iyo goor laabta ayaad iiga taallaa" iwm.

Iyada oo Mahdi hor-fadhida ayay badanaaba ku luuqeyn jirtay heestii ahayd:- "Sabab kale ha moodine, Suntaadii Habeennadan waan ka seexan waayoo, Seedahaad i gooysee".

Mahdi lama uusan gabban Jacaylka ee toos ayuu ugu sheegay Muna in uu jecel yahay, weliba wuxuu ka codsaday in ay badiso saacadaha ay isaga la joogeyso, u keento sawirkeeda, habeenkii kastana la cashayso. Muna waa ay soo dhoweysay codsiyadaas, iyada oo weliba dhoollacadaynaysa, bannaankana soo dhigaysa Cirridkeedii madoobaa iyo Ilkaheedii cad-caddaa ee weliba loogu dadaalayay nadaafadda.

Mahdi ma uusan heesi jirin Muna oo la joogta,laakin, markii uu keligiis yahay ayaa markii uu soo xusuustaba uu ku luuqayn jiray Heestii Suudaaniga ahayd ee "Waa jacaylkii iigu horreeyay, iiguna dambeynaya "(Awal-Xub wa-aakhir Xub).  Jacaylkan haleelay Mahdi wuxuu u muuqdaa kii ugu horreeyay ee soo mara abidkiis,waayo, kuwa dhowr ahaa oo kan ka horreeyay, waxay iska ahaayeen nooca loo yaqaan "Jacayl-Digaag".


La soco qaybta 2-aad....



WQ/Muxyaddiin M.Kaalmoy
kalmoi@hotmail.com



Allgedo News Media Network
allgedo@allgedo.com