(Qaybta 2-aad)

Dhaqaale ahaan Mahdi iyo Muna, maadaama ay labaduba Arday ahaayeen, waxba isma ay dhaamin, oo wax sidaas ah isuma ay tari karayn; walow uu Mahdi mararka qaarkood uu Lacago ka heli jiray Walaalihiisii waaweynaa ee shaqaalaha ahaa; markaasna uu Muna xoogaa uga tuuri jiray, ama ugu soo iibin jiray waxyaabo ay si gaar ah u jeclayd, sida:-  Cadar iyo Xalwad. Niyadda ayay labaduba isku dhisanayeen oo is-dugsanayeen, waxayna ku taamayeen, si dadbanna u wada lafa-guri jireen: Waxbarashada oo ay dhamaystaan, ku shaqaystaan Aqoon,urursadaan Hanti, wada dhistaan Qoys hagaagsan oo bilicsan, una adeegaan naftooda, dadkooda iyo dalkoodaba. Laakin Soomaalida ayaa ku halqabsata:- "Tii Alley noqon". Xiriirkii u dhaxeeyay Mahdi iyo Muna, waa uu sii xoogaystay,koray oo kobcay, jacaylkoodiina waa uu soo shaac-baxay, wuxuuna noqday: "War la qabaa xiiso ma leh" iyo "War Dhafoorkuu ku yaal". 

Badanaaba dadka Xaafaddu waa ay arkayeen oo garanayeen in ay labadatan Casar ilaa Fiid walbaa isku naban oo isku lammaanan in ay is-jecel yihiin. Docda kalena, wada socodkooda waa la ogaa in uu waddo san iyo tub toosan heysto,waayo labadaba waxaa lagu soo anqariyay Casharro diineed oo kala caddaynaya xuduudda ay kala leeyihiin labood iyo dheddigood iyo akhlaaqda Islaamiga ah ee loo baahan yahay in lagu dhaqmo.

Mahdi 3 ilaa 4-gu' ayuu ka weynaa Muna, waana sida badanaaba la bogaadiyo; waxayna Culimada Seykolojigu sheegaan: in ay Haweenku inta badan door-bidaan Ragga xoogaa ka da'-weyn, halka ay Raggu xushaan dumarka (gabdhaha) xoogaa ka da'-yar.Tani sidaas ugama foga maahmaahda Soomaaliyeed ee ah:- "Naag waxaa dhaqi kara, nin dhali kara".  Dhanka kale, dabeecadda, is-fahamka iyo is-waafaqa fikradeed iyo Seykolojiyeed ee Mahdi iyo Muna ayaa ahaa mid cajiib ahaa, oo ay Xog-ogaallada aan xaasidka ahayni u riyaaqayeen oo bogaadinayeen. Qaar baa dhihi jiray:- "Waxaa la moodaa Mahdi iyo Muna in Ciiddooda hal meel laga soo qaaday"...!!. 

Sidii ay Arrintu sidaas asaga ahayd, ayay habeen ka mid ahaa habeennada, sidii caadada ahaydba ay Muna u hoyatay Aqalkooda, ka-gadaal markii waqti qaali ahaa oo ay saxan-saxadu haraysay la qaadatay Mahdi. Isaga ayaa sii sagootiyay oo ku dhoweeyay Aqalkooda, waxayna ku soo kala tageen:- "Waa inoo habeen dambe Abbaayo" oo uu Mahdi yiri, iyo Muna oo ku jawaabtay:- "Waa hagaag Abboowe". Muna ayaa iyada oo war la' gashay Aqalkooda, waxayna toos u abbaartay Qolkeedii gaarka ahaa. Waxay rabtay in intii ayan seexan in ay xoogaa dib u jalleecdo oo isha mariso Casharradii uu u soo naqtiimiyay Mahdi. Waxayse ku sii luuqaynaysay erayo ku jiray heestii Magool ee "Webiyo isu ooman", heestaas oo ay beydadkeedu ku soo wada hoorayeen:- "Wax ku qaadan maysaan Wacdarrada Aduunkee weydiiya Culimada"..!!.

Muna waxaa qolkeeda uga yeertay hooyadeed Mullaaxo. Muna waxay soo gashay qolkii hooyo-Mullaaxo iyada oo moodaysa in loo dirayo adeeg-guri oo iska caadi ah.Waxayna tiri:- "Waa i kan hooyo, maxaan kuu qabtaa?". Hooyo-Mullaaxo ayaa si taxaddar leh oo deggan u tiri:-"Hambalyo hooyo macaan...intii aad maqnayd Caawa fiidkii ayaa lagu bixiyay...waxaana lagu siiyay Ina-adeerkaa Mooge".



La soco qaybta 3-aad....



WQ/Muxyaddiin M.Kaalmoy
kalmoi@hotmail.com



Allgedo News Media Network
allgedo@allgedo.com