(Qaybta 3-aad)


Mahdi dhankiisa kama ayan jirin wax dhibaato iyo dareen ah. Aqalkiisii ayuu dib ugu soo laabtay; wuxuuse seexashadiisa ka-hor dhegaha u raaricinayay Hees Jacayl ahayd oo Banaadiri ah,oo markaas ka socotay"Radiyo Mogadisho", taas oo ay erayadeedu ka mid ahaayeen:-"Minaan bukadoo berkoo beelo, haley barkiyo Baraarteeda"."Minaan dhinto oo Dhardhaar fuulo, haleygu dhaqo Dhareerkeeda"..!!. Waxayba u ekayd in ay Heestu ku dhega-hadlayso isaga Mahdi ah.

Laakin Muna habeenkaas oo dhan ma ayan seexan, oo labadeeda Indhood isuma ay geynin. Wuxuu u ahaa Habeen madow oo cadaabeed. Dhididkii ayaa ka dhammaaday. Waxay ku jirtay kurbo, kadeed, kaar iyo wadna kur-kur.Markii ay walaalaheed weydiisay halka uu Aabbaheed ku maqan yahayna, waxaa la xusuusiyay: inuu u hoyday xagga Minyaradiisii 4-aad ee uu maalmahanba arooska kula jiray.

Muna waxaa hor-yimid Ninkaas Ina-adeerkeed ah, ee la maaggan yahay in loo guri-geeyo. Waa nin ku-dhowaad 20-sano ka da' weyn iyada, dhowr Naagoodna hore u soo furay, dabeecad xun, qallafsan, isla-qab-weyn, kibir badan, naxariis-daran, gacantuna ay ka soo horrayso. Waxaa ay is-weydiisay: sababta uu Aabbaheed-Meygaag u siiyay Ninkaas..?. Waxaase u soo baxay in ay sababtu tahay xigtanimo, jaga fiican oo uu hayo iyo kuus lacag ah oo uu hoosta u geliyay Odayga, xilli uu aad ugu baahnaa...

Docda kale, waxaa ka soo hor-muuqday Muna kii ay dadka kale ka dooratay, ifkana ugu jeclayd oo ah "Mahdi". Waxay laabta ka tiri:- "Suuraddiisa oo qura ma siisteen Aduunyada haddey ii sinnaatee.." iyo "Dhowristiisa oo qura ayaan dhowr ku qadayaa(Mahdi)".  Habeenkii oo dhan bay soo jeedday, oo ay ka fekeraysay waxa iyada la gudboon, iyo jawaabtii ay ka bixin lahayd xaaladda lama-filaanka ah ee la deristay. Mar bay ku fekertay in ay is-disho oo Sun ama Dab isku khaarajiso,laakin, waxay haddana soo xusuusatay in Aakhirana Cadaab loogu darayo, waayo "Naftu waa ammaano".

Ugu dambayntii waxay go'aansatay in: iyada iyo Mahdi isla-baxsadaan, kana tallaabaan Xuduudaha dalka. Waxayse is-weydiisay su'aalo ay ka mid ahaayeen:-Tolow Mahdi ma oggolaanayaa taas ?. Xaggee laga helayaa kharajka safarka ? Jihadee la abbaarayaa ? iwm.  Sidii ay u fadhiday oo isula-hadlaysay ayuu waagii dillaacay oo maqashay Aadaankii Salaadda Fajarka. Ma ay xusuusan in ay labisato Garbasaar(Hagoog) iyo Kabo, Dacasba Allaha ka dhigee; iyada oo Guntiino oo kaliya xiran ayay aayar uga soo baxday Aqalkooda, iyada oo weli la wada hurdo.
Waxay soo abbaartay Aqalkii Mahdi, waddooyinkii bacaadka ahaa ee Xaafadda ayay orod ku soo jeexday, iyada oo ilmaynaysa ayayna soo gaartay Aqalkii Mahdi.
Weli mugdi ayay iska ahayd, qof-qof Masaajid ku socda mooyaane, cid kale ma ayan too toosin weli.
Aqalkii Mahdi ayay garaacday; waxaa soo jeeday oo Salaadda Subax u weysaysanayay oo kaliya Mahdi Aabbihiis "Muuse".

Aw-Muuse ayaa la yaabay cidda ku soo kallahday aroornimada. Wuxuu ku soo dhowaaday Albaabka wuxuuna intuusan furin weydiiyay su'aal ahayd:- "Yaa waaye hee ?". "Yaa noo socda Saacaddaan ?". Muna ayaa ku jawaabtay:-"Adeer Muuse, waa aniga..waa Muna Sheekh-Maygaag..iga fur adeer.". Deg-deg ayuu Muuse u furay albaabka, wuxuuna mar kale weydiiyay:_"See wax u jiraan Ina-Sheekhey,maxaa saacaddaan ku kallahinaya ? iwm.

Muna ayaa waxay ku jawaabtay, iyada oo ilmeynteedana qarinaysa:- "Waxba ma jiraan Adeer-macaane,Mahdi un baan rabay oo ay dani iga soo gashay". Deg-deg ayayna u soo dhaaftay oo u gudubtay qolkii uu hurday Mahdi.
Aw-Muuse,waa uu iska gartay in ayan xaaladdu ahayn Caadi, illayn waa waayeele.Waxaana la yiraahdaa:-"Kor waayeel, hadduusan wada-caqli ahayn, waa wada-indho" ,"Geelu laba jir soo wada mar", "War jiraaba Cakaaruu iman" iwm.  Muna ayaa waxay si xoog leh u garaacday Albaabkii qolka Mahdi. Si fajac leh ayuu Mahdi u soo booday oo u furay Albaabka, isaga oo feera-qaawan.
Durba Muna ayaa ku boodday Mahdi, ugu qubaysay illinteeda, kana dhunkatay wejiga kore, labada Gacmood, labada dhaban iyo Wadnaha dushiisa, iyada oo barooranaysa, isla markaasna cod dheer ku leh:-"Mahdiyow, macaanow,Aabbahay Maygaag ayaa i bixiyay oo i siiyay Bahal lagu magacaabo Mooge....". Waxay kaloo tiri:-"Ma adiga oo ifka ku nool, oo aan ku arkayo, miyaan nin kale u noqonayaa naag..?".

Mahdi oo aan weli warku u  caddaan, gariiraya, jahawareersanna ayaa ku celceliyay..:-"Yaa, yaa, yaa,,,. maxaad sheegaysaa ?.  See camal ?....

La soco qaybta 4-aad.


WQ/ Muxyaddiin M. Kaalmoy
kalmoi@hotmail.com



Allgedo News Media Network
allgedo@allgedo.com