(Qaybta 4-aad)

Mahdi Aabbihiis Muuse ayaa markii uu Kallahaadda aan caadiga ahayn ee Muna arkayba dib ugu laabtay qolkiisii, si uu xaaskiisa Maleyko ugala soo showro arrinka.  Waxay Muuse iyo Maleyko bilaabeen in ay isla rog-rogaan: waxa ka soo bixi karaya ujeeddada imaatinka Aroornimo ee  Muna ee ku wajahan Mahdi. Iyaga oo isla-falanqayntii ku guda-jira, ayay durba maqleen Baroorashada uu codkeedu dheer yahay ee ka imanaysa Muna iyo weliba erayadii kal-gacaylkku ku dheehnaa ee ay iska daba-gaynaysay:-sida:-Mahdiyow, Macaanow, kaama maarmo iyo erayo kale.
    
Dhankii qolka Mahdi ayay u soo deg-degeen Muuse iyo Maleyko, waxayna ku dhawaaqayeen Alla-bariyo ay ka mid ahaayeen:-"Allow na astur","Ilaahow ha nagu ceebayn reer Sheekh-Maygaag", "Eebbow na furo" iwm.  Albaabkii qolka Mahdi ayaa la isugu wada-yimid. Muna weli waa ay ooyaysay; weli waxay si cajiib ah meel kasta uga dhudhunkanaysay Mahdi. Mahdi laftiisu waa uu ilmaynayay, walow uusan faafaahin ku filan weli ka helin Muna.
    
Hooyo-Malayko oo aad u amakaaksan ayaa waxay tiri:- "Horta na soo geliya qolka oo noo sheega sida ay wax u jiraan". Aabbe-Muuse ayaa isaguna raaciyay:- "Munaay Ina-sheekh, ha ooyin, annagana ha naga oohinnin; noo warran horta, ogowna dhibaata kasta oo jirta in xal loo heli karo idim allah". Wuxuu Aabbe Muuse ku maahmaahay:-"Haddii sidee wax la yeelaa la is-yiraahdo, lama waayo, si wax la yeelo". Wuxuu kaloo soo xigtay Murtida ah:-"Rag tashaday dhul waa toli
kara, taako labadeede". iwm.

Qolkii yaraa ee Mahdi ayaa la isugu wada-tagay oo la fariistay (Muna, Mahdi, Malayko & Muuse). Meel aan qolka ka fogayn waxaa taagnayd oo la yaabbanayd waxa socda: Mahdi walaashiis Muumina (Muumow), taas oo dhegaha iyo Indhahaba taagaysay.
    
Hooyo Malayko ayaa bilowday hadalka, waxayna tiri:- "Munaay, Geberteey, see camal waaye, horta noo warran oo hintana iska jooji". Abbe-Muuse ayaa isaguna tibaaxay:- "Dhibkaaga, waa na dhibaa, caddeey warka, run iyo ilkaba waa la caddeeyaa". Wuxuu kaloo ku maahmaahay:-" War la uumba-uumbeeyo, waykac aa ka roon".  Waxa ugu weyn ee ay Hooyo Malayko iyo Aabbe Muuse ka baqayeen ayaa ahaa:-In ay dhici karto in Mahdi iyo Muna uu Shaydaanku ka dhex adeegtay oo ay hoos-hoos isugu taraaraxeen (isu-galmood); markaasna ay Muna u barooranayso ogaanshaha Uur
ay ogaatay in uu ku soo baxay dartiis, ayna ka rabto Mahdi in uu asturo, qirto oo xal u helo arrinka.
    
Laakin, Allah mahaddiis marnaba fal-xumidaas iyo fisqigaas iyo wax ku dhow toonna weligood ma ayan dhex-marin Muna iyo Mahdi. Xitaa is-dhudhunkashada (shumis) saakay meesha ka dhacay ayaa iska ahaa mid hor leh oo anaan caadi ahayn, loona xisaabayn.
    
Muna ayaa hadalka qaadatay, waxayna iyada oo weli hingoonaysa shaaca ka qaadday, kuna cabatay:- In ay si xad-dhaaf ah u jeceshahay Mahdi, ku-qanacsan tahay, uuna laabteeda dhex-degay, qasadkeeduna uu ahaa in ay mustaqbal wada dhistaan, ka-dib marka ay waxbarashada dhamayastaan, laakinse uu aabbaheed Sh.Maygaag siiyay Nin kale, isaga oo aan la tashan iyada, eeginna ku-talaglkeeda xagga mustaqbalka ah iyo waxa ay ku taamayso toonna,taasna ayan qaadan karayn marnaba.
     
Aabbe-Muuse ayaa ku jawaabay:-"Dhib ma leh,taas camal weligeedba waa dhici jirtay, aniga ayaana ka-arki doona Sheekha,kana waraysan doona sida ay wax u jiraan".

Muna ayaa dib u qaadatay hadalka,waxayna tiri:-"Aabbe Muusow iyo Hooyo-Maleykaay, idinka oo eegaya aadaminimada, wax nala qabta maanta Aniga iyo Mahdi. Anigu marnaba kama hari karayo Mahdi inta aan noolahay, dartiis ayaanna u dhimanayaa".

Hooyo-Malayko ayaa si argaggax leh ula soo boodday erayada ah:-"Mashaqo waa tan oo kale, Jacaylna waa kan oo kale, Geberteey, maxaan samaynaa hadda...?!!".  Muna:-" Noo raadiyo lacago aan aniga iyo Mahdi ku baxsanno ,oo uga tallowno Xuduudaha, badba aan ku dhacnee".

Hooyo-Malayko:-" Hee intee u baxaysiin ? Maxaad isku tari karaysiin ?..yaasiinka iyo tabaaraggee?!.  Aabbe-Muuse:- "Maya, maya, maya, taas talo ma aha, waxayna u ekaanaysaa Reer Muuse oo maja-xaabiyay reer Sheekh-Maygaag"."Halkan dhabar-jebin loogama samaynayo Sheekha", "Anigu waan yaqiinsanahay jiritaanka jacayl, waana aan qabaa in labadii is-jeclaata ay isla dhistaan mustaqbal, gacanna la siiyo, laakin, yaanan deg-degin...yacni...wallaahi ma ogi...

Hooyo Malayko:- "Hee, see camalkaa,gebertaan cawadaaba la guurihooyaa,sheekadeeda waa soo dhamaatay, sheekhana waa loo laabay kistiisa". Aabbe-Muuse:- " Maxaan qaban karnaa markaas"? H. Malayko:- "Talo fiican anigaa haaya ee iga dhegeysta, talana waa tii Rabbi, tiisayna tageysaa..."

Mahdi isagu waa uu iska aamusnaa oo sii  ilmaynayay markii uu wejiga Muna hoos ka eegaba, wuxuuna niyadda iska-lahaa:-"Allah Ciil iyo Caro weynaa"....!!

 
La soco qaybta 5-aad.


WQ/ Muxyaddiin M. Kaalmoy
kasmo1561@hotmail.com


Allgedo News Media Network
allgedo@allgedo.com




 

                            Allgedo  Online © 2006 - All Rights Reserved.                        
 Contact us at: allgedo@allgedo.com