Ka jawaab celin qoraalkii Xildhibaan Mawliid Macaani

Waxaan rabaa in aan ka jawaab celiyo qoraal lagu soo qoray shabakada puntlandpost iyo somaaliweyn oo ahaa qoraal ka soo baxay xildhibaan mawliid macaani maxamuud oo ah xildhibaan ka soo  jeeda beesha jareer weyne, qoraalkaas oo uga hadlaayey arrimo badan oo ku saabsan  soomaaliya hadii ay tahay paarlamaanka, dagaaladda, dib u heshiisiinta, shirarkii loo qabtay soomaaliya  oo ahaa 16 shir. 

Waxaan raaba in aan marka hore isbaro mawliid macaani, annigu waxaan ka mid ahaa aqoonyahanadii wasaaradii qorsheynta qaranka ee soomaaliya maamulkii ugu dambeeya soomaaliya 1991, wasaaradaas oo uu mawliid macaani ka agdhawaa uuna ka mid ahaa ragii wasiirkii qorsheynta qaranka marxuun xuseen kulmiye afrax la socon jiray amase iskoordo (scort) u ahaa:

Mawliid wuxuu ka hadlay wax  yaabo fara badan oo dhamaantood uu u arko in ay ahaayeen a kuwo aan loo agaasimin sidii saxa ahaa hadii ay tahay shirarkii, dib u heshiisiintii iyo 4.5 sidii loo maamulay, taasuu uu ku tilmaamay wax aan sax ahayn, waxaa kale oo uu yiri 4.5 wax sax ah maysan ahayn, waxaa kale oo uu sheegay in ay jiraan  6 beelood oo ah Hawiye, Darood, Dir, Digil iyo Murufle, jareer weyne iyo reer banaadir waa sida uu hadalka u dhigay, mawliid macaani waxaa kale oo uu si toos ah u carabaabay in ay jiraan dad aan mudnayn wasiirnimo in la siiyo oo lagu siiyay timahooda oo jilicsan iyo sankooda  oo dhuuban. Waxaa kale oo mawliid macaani ku eedeeyay madaxweynihii hore ee soomaaliya cabdullahi yusuf axmed in uu sameeyay 4.5 isagoo u daneenayay carab maxamuud saalax si ay baarlamaanka xildhibaano uga hesho. haddaba waxaan u sheegaya mawliid macaani  in beesha meherigu ay tahay beel ka mid ah beelaha soomaaliyeed ee tariikhda dheer ku leh soomaaliweyn dhexdeeda kana soo qadatay  dawr weyn xornimada iyo siyaasadaha soomaaliya waqtiyadii la soo dhaafay ayna tahay beesha kaliya ee wax colaad ah ka dhexeen beelaha soomaaliya kuna caan baxday ilbaxnimo, deris wanaag iyo wada noolaansho. 

Waxaa nasiib daro ah mawliid macaani oo ka cabanaaya cadaalad daro lagu sameeyay beesha jiir weyne hadana uu lee yahay maxaa carab maxamuud saalax loo siiyay xildhibaano mase uu ku eedeeyay madaxweynihii hore cabdullaahi yusuf ayaa sameeyay 4.5 isagoo u daneeynayay beesha meheri,runtii waa  nasiib daro qof cadaalad daro ka cabanaaya hadana ruux kale uranaaya ha lagu sameeyo. waxaan filayaa in ay tahay wax damiirka bini aadamka ka baxsan. Waxaa lee yahay mawliid macaani oo leh annagu waxaan lee nahay 9 gobol taasu in ay tahay waxa soomaalidu 20 sano ay  ku dagaalamayso, teeda kale waxaan u sheegaya in meherigu uusan jareer weyne wax dulmi ah ku sameeyneyn, dhul iyo deegaana aysan ka dooneyn, waxaana fiicnaan lahayd in mawliid macaani uu hadaladiisa dib ugu noqdo. 

4.5 ma uusan sameyn cabdullahi yusuf axmed, madaxweynihii hore ee soomaaliya, waxaa lagu sameeyay shirkii ugu dambeeyay ee soodare itoobia waxaana lagu dhaqan galiyay shirkii lagu soo doortay madaxweyne cabdul qaasim salaad, cabdullahi yusuf axmed waxuu si toos  ah iyo si dadbanba u tageeray jareer weyne, siyaabo badan oo aanan halkaan hada ku xuseyn ayuu ku taageeray waana arrimo siyaasadeed oo markaas socday, siyaasaduna maalinba meel ayay joogtaa.

Waxaan oran lahaa mawliid macaani,  ma waxaad leedahay meheri soomaali ma ahan, maxaad ugu diidan tahay in ay baarlamaanka ka mid noqdaan mise waxaa lee dahay meheri waa qabiil kale oo waxay kuraas ku lee yihiin qabiilkaas, waxaan rabaa in aan u sheego mawliid macaani in uu ka haro wax ka sheega meheri, hadii uu wax ka maqan yihiin cida ay uga maqan tahay uu diiirada saaro, jareer weyne cidii wax u dhintay waa la yaqaan, meheri jareer weyne wax colaad ah uma qabaan waana eebe mahadiisii in aysan meheri colaad u qabin soomaali weyn mana ahan dad dhaqan u leh in ay dulmiyaan dad soomaali ah, waxaana keenaysa ilbaxnimada iyo aqoonta dheer taasoo ay ka dhaxleen degaanadii iyo dhulkii ardi almahra -Yemen.

 

Dahir Xaashi Warsame – mbc/Uk
dwarsame@hotmail.com