Allgedo News, May 23, 2008
Labo beelood oo ka wada tirsan degmada Luuq ee Gobolka Gedo oo maanta heshiis nabadeed gaaray
Luuq, Somalia (AOL) - Labo beelood oo ka mid ah beelaha ku dhaqan degmada Luuq ee G/Gedo oo bilihii u danbeeyey uu dagaal ku dhex maray duleedka waqooyi bari ee degmada Luuq ayaa maanta heshiis ku gaaray degmada Luuq.   Shirweyne ballaaran oo ay ka soo qayb galeen wax garadka labadan beelood, maamulka degmada, kan gobolka, ergo nabadeed oo ka kala yimid gudaha gobolka iyo gobollo kale oo daris ah sida Bay iyo Bakool iyo weliba mas'uuliyiin kale ayaa maanta lagu heshiisiiyey labadan beelood.   Labadan beelood oo kala ah beesha Macallinweyne oo ka tirsan beelaha Digil iyo Mirifle iyo beesha Gaadsan oo iyana ka tirsan beesha dirta ayaa shirkan lagu heshiinayey oo socday mudo 15 cisho ah, waxaana shir nabadeedkaan soo qaban-qaabiyey Hay'adda CARE INTERNATIONAL ayada oo  shirkan qabanqaabadiisa iyo tasiilaadka ku baxayba Hay'adda uu wakiil uga ahaa sarkaalka madaxda ka ah qaybta PEACE BUILDING ka ee hay'addaasi Mr Axmed Sh. Cali Guuleed.   Shirkan oo ahaa mid ahmiyad la siinayey ayaa dhammaan mas'uuliyiintii ka hadashay waxay dhammaantood ku nuux-nuuxsadeen in ay labada beelood ee heshiiska ku gaaray maanta degmada Luuq ka dhabeeyaan ballan-qaadyadooda ayna u hogaansamaan qodobada ka soo baxay shirkan.   Sida aad ku aragtaan sawirrada la socda warbixintan ayaa waxaa halkaasi lagu gowracay labo sabeenood iyo weliba labo rati sida lagu yaqaan caadada beelaha soomaaliyeed oo uu heshiiska dhex maro.   Ugu danbayntii, waxaa maalinta Axadda ah ee ku beegan beri danbe loo balamay in kolonyo baabuur ah lagu aado goobaha ay kala degan yihiin ciidamada laba beelood, halkaana lagu kala raro loona gudbiyo waxii la isku afgartay.   Mas'uuliyiintii meesha ka hadashay ayaa waxaa ka mid ahaa Maxamed Cabdi Kaliil oo ah Gudoomiye Ku xigeenka 1-aad ee G/Gedo isaga oo uga mahadceliyay Hay'adda CARE juhdigi iyo tasiilaadkii ay ku bixisay shirkan, isaga oo sida oo kale u mahad celiyey ergooyinki u yimid shirkan kuwaasi oo ka kala yimid meelo fog-fog.
Qaar kale oo ka mid ah masawiradii laga qaaday maanta shir nabadeedkii lagu dhex-dhexaadinayay laba beelood oo wada dega Degmada Luuq.  May 23, 2008/AOL

Allgedo News Media Network
allgedo@allgedo.com



 

                            Allgedo  Online © 2006 - All Rights Reserved.                        
 Contact us at: allgedo@allgedo.com