Doorashadii gudoomiyaha gobolka Gedo oo uu si rasmi ah ugu guuleystay mudane Xuseen Sh. Cabdi Iasmaaciil (Farey)


Doorashada gudoomiyaha gobolka Gedo oo maanta ka dhacday degmada Garbahaarey oo ay ku tartamayeen saddex musharax ayaa waxaa ku guuleystay mudane Xuseen Sh. Cabdi Ismaaciil (Farey.)

Saddexda musharax oo tartanka gudoomiyaha gobolka gedo ku jiray ayaa waxay kala yihiin: Xuseen Sh. Cabdi Ismaaciil (Farey), Aden Ibrahin Aw-Xirsi (Cirro) iyo Jamaal Xasan Sarey.

Mudane Farey ayaa sanadkii 2004 waxaa ay dowladda KMG ah usoo magacowday in uu noqdo gudoomiyaha gobolka Gedo, hase yeeshee markii uu xilka gudoomiye nimada hayay 11 bilood ayaa waxay isla dowladda KGM ah gudoomiyaha gobolka gedo usoo magacowday mudane Cirro kaas oo hadda looga adkaaday tartanka gudoomiyaha gobolka Gedo.

Sidoo kale, waxaa iyana jiray 5 musharax oo jagada gudoomiye ku xigeenka gobolka Gedo tartan ugu jiray oo kala ah: Maxamed Axmed Cali (Sanka) oo labadii maamul ee uu gobolku soo yeeshay kasoo noqday gudoomiye ku xigeenka 1-aad, Maxamed Cabdi Kaliil oo ahaa Taliyihii Difaaca ciidamada gobolka Gedo, Maxamed Xuseen Buraale (John surxun), Cabdi Bare Cabdi iyo Cabdi Qatar.

Tartan adag oo maanta ka dhacday magaalada Garbahaarey kaddib, waxaa gudoomiye ku xigeenka 1-aad ee gobolka gedo ku guuleystay Maxamed Cabdi Kaliil (eeg masawirka midig), halka uu gudoomiye ku xigeenka 2-aad ku guuleystay Maxamed Xuseen Buraale (John surxun.)

Tartanka adag ee maanta Garbahaarey ka dhacay oo loogu tartamayay jagooyinka gudoomiyaha gobolka Gedo iyo ku xigeenadiisa 1-aad iyo labaad ayaa ragii ka qeyb galay codadka ay kala heleen waxay ahayd sida soo socota:-

SIDA LOO KALA HELAY CODADKA JAGADA GUDOOMIYAHA GOBOLKA GEDO

 1. Xuseen Sh. Cabdi Ismaaciil (Farey) oo ku guuleystay gudoomiyaha gobolka Gedo waxuu helay 19 cod
 2. Aden Ibrahin Aw-Xirsi (Cirro) waxuu helay 11 cod
 3. Jamaal Xasan Sarey waxuu helay 2 cod

SIDA LOO KALA HELAY CODADKA JAGADA GUDOOMIYE KU XIGEENADA 1-AAD IYO 2-AAD EE GOBOLKA GEDO
 

 1. Maxamed Cabdi Kaliil oo tartan ugu jiray jagada guddoomiye ku xigeenka 1-aad ayaa ku guuleystay, waxuuna helay 21 cod
 2. Maxamed Xuseen Buraale (John surxun) oo tartan ugu jiray jagada gudoomiye ku xigeenka 2-aad ayaa ku guuleystay, waxuuna helay 26 cod
 3. Maxamed Axmed Cali (Sanka)  11 cod
 4. Cabdi Bare Cabdi  3 cod
 5. Cabdi Qatar  2 cod

Aden A. Colujoog, AOL



Allgedo News Media Network
allgedo@allgedo.com