Goobahii la nadiifinayay oo ay ka howl galayaan dadweyne isugu jira rag iyo dumar /May 19,08 - AOL.

Guddoomiyaha Degmada Baardheere - Maxamed Xirsi Dhudi iyo hawl-wadeenada SADO oo kor meeraya goobaha la nadiifinayay/May 19, 08 - AOL.

Qalabkii shaqada ee wax looga qabanayay nadaafad darada & dadkii ku shaqeyn lahaa oo heegan ah/May 19, 08 - AOL.

Baardheere, Somalia (AOL) - Hay'adda Samafalka Wadaniga ah ee SADO ayaa maanta gudaha Xaafadaha Baardheere iyo xeryaha Qaxootiyada waxay ka bilowdey Olole balaaran oo lagu nadiifinayo xaafadaha ay ka kooban tahay Magaalada Baardheere, si wax loogaga qabto xaaladaha Caafimaad daro ee ka taagan Gudaha iyo Daafaha Magaalada Baardheere, iyadoo Xafladii furitaanka Ololaha nadaafadeedna oo saaka ka dhacdey Xarunta SADO ayaa waxaa ka soo qeyb galey Mas'uuliyiin ka tirsan Maamulka Degmada Baardheere, Howlwadeenada SADO iyo dadweyne aad u faro badan.

Axmed Maxamed Salaad (Shiino) oo ka mid ah howlwadeenada Hay'adda SADO ayaa waxaa uu sheegay Ololahan nadaafadeed oo ah kii ugu balaarnaa ee Degmada laga fuliyo in uu socon doono mudo 15 Maalin ah, iyadoo shaqadaasina ay fulin doonaan dad gaaraya ilaa Boqol qof oo isugu jira rag iyo Dumar oo loo dhameys tirey dhamaan waxii Qalab ahaa ee lagu shaqeyn lahaa, islamarkaana Hay'adoodu ay kharash ku bixin doonto howshaasi.

Axmed Shiino ayaa waxa kale oo uu sheegay ujeedada ay ka leeyihiin Howshan balaaran ayuu ku tilmaamay sidii xaaladaha Nadaafo daro ee ka taagan Magaalada Baardheere wax loogaga qaban lahaa, isla markaana loo soo celin lahaa bilicdii magaalada, maadama had iyo jeer cudurada faafa ee ka dilaaca deegaanka inta badan ay ka dhashaan nadaafad darida ka taagan deegaanka.

Sidoo kale, Gudoomiyaha Degmada Baardheere. Maxamed Xirsi Dhudi oo hadal kooban ka jeediyey Goobta ayaa waxuu ku Amaanay Hay'adda SADO, ololaha balaaran ee nadaafadeed oo uu sheegay inay wax kaga qabanayaan xaaladaha nadaafad daro ee ka taagan Gudaha iyo daafaha Magaalada Baardheere,isagoo tilmaamayna dhibaatada caafimaad daro ee haatan ka jirta Magaalada Baardhere in ay ugu weyn tahay Arimo la xariira nadaafad xumida.

Dadweynaha Magaalada Baardheere oo iyagu Asbuucyadii u dambeeyey ka cabanayey dhibaatooyin la xariira caafimaad daro ayaa soo dhaweeyey talaabadan cusub ee wax loogaga qabanayo nadaafada Magaalada Baardheere.




Axmed Cumar Saalixi - Baardheere, Gedo.
 

                            Allgedo  Online © 2006 - All Rights Reserved.                        
 Contact us at: allgedo@allgedo.com