Taliyihii ciidamada Qalabka sida ee Gobolka Hiiraan oo la diley

Baladweyne, Somalia (AOL) - Kooxo hubeysan ayaa xalay magaalada baladwayne ee gobolka Hiiraan waxaa ay toogasho ku dileen taliyihii ciidamada milatariga Dowlada KMG ah ee Gobolkaasi G/sare C/laahi faarax Juni.

Weerarkaasi lagu qaaday taliyaha oo dhacay xalay saqdii dhexe ayaa loo adeegsaday rasaas iyo Bambaanooyin lagu riday gurigiisa oo ku yaala gudaha baladwayne, waxanay kooxihii dilkaasi gaystay ay gudaha u galeen guriga taliyaha iyagoo kala soo baxay isla markaana ku dilay Taliyaha meel ka baxsan hoygiisa.

Rasaasta lala beegsaday guriga taliyaha ayaa si wayn looga maqlay guud ahaan Magaalada Baladwayne, iyadoo falkaasi ay si aad ah uga xumaadeen qeybaha kala duwan ee bulshada ku dhaqan degmada Baladwayne, maadaama ninkaasi si wayn looga yaqaano gobolka Hiiraan.

Magaalada B/wayne ayaa waxaa ka socda kulamo looga hadlayo dilka Taliyaha iyadoo cabsi iyo walwal laga muujinayo xaalada amaan ee Magaaladaasi.  Ma jirto cid sheegatay inay ka dambeysay dilkaasi ka dhacay xalay B/wayne.

G/sare C/laahi Faarax Juni ayaa la magacaabay 6 bilood ka hor, kadib markii xilkaasi uu ka geeriyooday Col. Axmed Maxamed xudayro oo isagu ahaa taliyihii ciidamada qalabka sida ee gobolka Hiiraan oo xanuun Awgiis ugu dhintay Baladwayne.


Xafiiska Wararka Allgedo ee Muqdisho, Soomaaliya.



Allgedo News Media Network
allgedo@allgedo.com