Xaalad nolol xumo tii ugu darneyd ayaa soo wajahdey qoysas soo bara kacay ee daadsan duleedka iyo daafaha magaalada Caabudwaaq tan iyo intii laguda galey bisha barakeysan ee Ramadaanka

Barakacayaasha ayaa ku jira xeryo gaaraya 5 kuwaasi oo kala ah Xurfada, Balli Giish, Garasle, Dayacan iyo Alla Aamin oo dhamaantoodna ay hoy iyo harsi u tahey dadkan ku jira oo la murugeysan baahida ay ka dhaxleen abaarta dhameysay dadkaasi qaar ka mida duunyadii ay dhaqanayeeen ka hor inta aaney soo dagin raaska ay ku nool yihiin oo ah mid ay Alle ugu marti yihiin, balse aaney xiligan dhowreyn gacan ay ka helaan bini’aadamka maadaama baahi tire uu yahey Alle Cazaa Wajale.

Waxaa wehliya dad kale oo marti u noqdey goobta il xumada leh kadib markiii manaxayaal ay ka soo barakiciyeen goobihii ay ku sugnaayeen sida Muqdisho iyo Ismaamulka Somalida ee Dowlada Ethiopia ay maamulato, kadib markii xiisado iyo colaado aan dhamaad laheyn ay ku qasbeen inay kasoo cararaan hoygoodii.

Socdaal aan ku soo marey goobahaasi ay ku jiraan dadka ayaan kula kulmey hooyo waayeel ah oo da’deeda iigu sheegtey 60 sano jir oo heysay 2 gabdhood iyo wiil, waxaa ay da’da gabar caruurta ay heysay ugu weyneyd iigu sheegtey 4 Sano jir halka wiilka ugu yarna ay iigu sheegtey 7 bilood jir, kadib waxaa aan weydiiyey sida ay nolosheedu tahey waxaana iyadoo hadalkeedii sii wadata ay tiri “waalidkii ilmahaan aan hayo oo ahaa gabar aan anigu dhaley iyo seygeediiba waxay aadeen magaalka, caruurtu waa ay hamuuman yihin, afkoodii saaka ayay qabaan oo ma jiryto wax ka dagey ama ay cuneen ilaa xiligan oo aad aragto inay wareegtey qoraxdu sababtuna waa wax la’aan, waalidkii dhaley labadaba suuqa ayey galeen, sidii soonku uu u dhashey ma jirin gacan iyo gar gaar nasoo gaarey”.

Waxaa aan weydiiyey sababta labadii walid ay u cidleeyeen ilmaha oo iyada oo waayeela looga tagey? Waxeyna tiri iyadoo hadleysa “sida kuu muuqata ilmahaan waad aragtaayoo waa shimbiro doonaya afka in wax loo galiyo wax la aanta ayaana keentey inay labadoodii waalidba isku mar u cararaan magaalka.”


Waqtiga aan booqanayey xeryaha oo aheyd duhur ku dhawaad ma jirin qof xoog leh ama dhaq dhaqaaqi kara oo joogey xerada, intii aan ku sii socdayna waxaa iga hor imaanayey haween tunka xaabo ku sida, balse aqalada ayaa ahaa kuwa laga dareemayo cidla halka kuwa aan ugu dul tagey dad waayeel caajis ah oo makacayaal u badan; waxaana sababta la iigu sheegay in ragii ay suuqa u xamaali tageen, halka dumarka xooga lehna ay xaabo ama qoryo u qaadeen suuqa si ay u beeciyaan, kadibna ay ugu soo badashaan raashin ay ku maareeyaan nafta noolaha ay uga tageen raaska madow.

Waxaan sidoo kale la kulmey 2 caruura ah oo biyo ka dhaansanayey baco ay ku hareen biyo haraa ah oo muuqaalkoodu dilnaa ayna halis tahey in xitaa Caafimaadkooda ay waxyeelaan.

Ugu danbeyn, waxaa ay ii sheegeen dadka xeryahaasi aan kula kulmey inaysan jirin wax gar gaara oo ay helaan oo dhaafsiisan gacanta hay’adaha WFP iyo UNICEF oo kala qaabilsan quudinta caruurta iyo raashinka, waxyna meesha ka saareen warar shegayey in ay heleen lacago loogu deeqay barakacayaasha oo jaaliyaduhu leedahey taasoo ay ku sheegeen inay tahey mid ay maqleen oo aan gacmahooda lasoo gaarsiin.


C/kariin Axmed Bulxan, Caabudwaaq-Somaliya
Email: Kulan105@gmail.com, ibagale1@hotmail.com




Allgedo News Media Network
allgedo@allgedo.com



 

                            Allgedo  Online © 2006 - All Rights Reserved.                        
 Contact us at: allgedo@allgedo.com