Wareysi ku saabsan kulan dhawaan ka dhacay degmada Diinsoor ee Gobalka Bay oo lagaga hadlayay Sameynta Gudi u ololeeya xuquuqda Aadanaha Soomaaliyeed  oo ay ka soo qaybgaleen 6 Gobal oo ka mid ah Gobalada Koofurta Soomaaliya.
 

Waxaa dhawaan lagu soo gabagabeeyay degmada Diinsoor ee Gobalka Bay kulan wadatashi ah oo looga hadlayay sidii loo samayn lahaa gudi lagu magacaabo Somali Human rights Commission.
 

Kulankan oo ay soo qaban-qaabiyeen qaar ka mid ah Ururada u dooda xuquuqda aadanaha oo fadhigoodu yahay magaalooyinka Baydhabo iyo Kismaayo ayaa waxaa ka soo qaybgalay xubno gaaraya 95 xubnood oo ka kala socday 6 Gobal oo ka tirsan Koonfurta Soomaaliya oo kala ah Gedo, Bay, Bakool, J/dhexe, J/hoose iyo Sh/hoose, iyadoo sidoo kale kulankaasi ay goobjoog ka ahaayeen qaar ka mid ah Ururada Bulshada Rayidka ah ee ka jira Magaalada Mogadishu.
 

Xubnaha ka qaybqaadanayay kulankan wadatashiga ah oo lagu dooranayay gudi ka kooban 14 xubnood oo matala gudigaas loo bixiyay “Somali Human rights commission”  ayaa waxaa ka mid ahaa wariye Axmed Cumar Saalixi oo kulankan uga qaybgalay Ururka Mideynta Suxufiyiinta Gobalka Gedo ahna tifatiraha website-ka Allgedo-online.
 

Hadaba waxyaabihii laga hadlayay iyo wixii ka soo baxay waxaa noo suuragashay inaan wareysi kala yeelano arimahaaasi Wariye Saalixi oo iminka dib ugu soo laabtay degmada Baardheere wuxuuna wareysigii u dhacay sidatan: -
 

Su’aal: Ugu horeyntii waxaad warbixin kooban naga siisaa waxyaabihii kulankaasi looga hadlay

Saalixi: Keynaan hadii aan kaaga waramo kulanka wuxuu ahaa mid looga arinsanayay sidii loo samayn lahaa gudi ay ku mideysan yihiin Ururada bulshada rayidka ah gaar ahaa kuwa u dooda xuquuqda aadanaha ee Soomaaliyeed, kulankan wuxuu dabajoogay kulamo horey loogu soo qabtay magaalooyinka Mogadisho, Gaalkacyo iyo Boosaaso waxaana lagu sameeyay shirkan gudi ka kooban 14 xubnood oo laga soo xulay xubnihii ka kala socday 6 da Gobal kuwaas oo gundhig u noqon doona Somaali Human rights Commission oo shir kale oo dhawaan la filayo inuu ka furmo magaalada Mogadisho lagu dhamaystiri doono dhismaha Commission kan.
 

Su’aal: Yaa maalgaliyay islamarkaana soo qaban-qaabiyay kulankan?
 

Saalixi: Kulankan oo soconayay mudo labo maalmood ah waxaa soo qaban-qaabiyay hay’ada lagu kala magacaabo ISHA Human rights oo fadhigeedu yahay magaalada Baydhabo iyo Ururka Samafalka wadaniga ah ee marka la soo gaabiyo loo yaqaan CASINA oo isna fadhigiisu yahay magaalada Kismaayo, iyadoo kharashka ku baxay kulankana ay bixisay Hay’ada Caalamiga ah ee NOVIB Netherland.
 

Su’aal: Maxaa ka soo baxay gabagabadii kulanka aad ka qaybgasheen?
 

Saalixi: Horta muhiimadu waxay ahayd in la doorto gudi 14 ah oo laga dhex xulanayay 7 gudi oo la isku qaybiyay kuwaas oo ka kala socday ururada u ololeeya xuquuqda Aadanaha, Ururada Samafalka wadaniga ah, Saxaafada, Ururada Haweenka, Ururada Dhalinyarada iyo aqoonyahanada iyadoo gudi walbana laga doonayay inay ka soo baxaan labo qof oo mid ay tahay haweeneey doorashadaasina si habsami leh ayay ku dhacday.
 

Su’aal: Xubnihiini ka socday Gobalka Gedo imisa xubnood ayaa ka mid noqotay gudigaasi 14 ka xubnood ah ee la iska dhexdoortay?
 

Saalixi: Waxaan ku soconay 6 xubnood oo aan kaga qaybgalnay shirka, waxaana ka mid noqday gudiga 3 xubnood oo kala ah anigoo qofkii koowaad noqday 2 dii qof ee laga rabay 6 Gobal dhinaca saxaafada iyo Aadan Xasan Barre oo ka socday Ururka SADO iyo Gabar ka socotay Ururka Dhaliyarada Gobalka Gedo oo lagu magacaabo Deeqo Xuseen. Run ahaan tiina waxaa muujinay firficoon iyo dadaal dheeraad ah waxaan kulanka ka qaadanay door muhiim ah. 

Su’aal: Su’aasha ugu dambaysa ee aan ku waydiinayo waxay tahay waa sidee xaalada Guud ee degmada Diinsoor?
 

Saalixi: Degmada diinsoor hada way degantahay inkastoo dhawaan ay dagaalo ka dhaceen qaar ka mid ah tuulooyin hoosyimaada degmadaasi, hadana indhahaygu ma qaban wax dareen colaadeed ah oo ka jira deegaankaasi, degmadana waxaa ka dhisan maamul degmo oo ay bulshadaasi iska dhexdoorteen, waxaan deegaankaasi ka howlgala qaar ka mid ah NGO –yada caalamiga ah oo run ahaantii howlo badan ka qabtay dhinacyada caafimaadka, Beeraha iyo xoolaha, waxana degan labo shirkadood oo xaga telephone-ada ah oo kala ah Nationlink iyo Hormuud, dhinac kaliya oo ay ka liidatay ayaa ahaa xaga waxbarashada.
 

Su’aal: Mahadsanid Saalixi
 

Saalixi: Adiga ayaa mudan.

Waxaa wareysigan diyaariyay: -

Wariye:  Xasan Cabdi Keynaan

Baardheere, Somalia.



allgedo@allgedo.com

 

All Gedo Online © 2004 - All Rights Reserved.
contact us at: webmaster@allgedo.com