SIGN/VIEW: GUESTBOOK

May 26, 2004

Sida la wada ogsoon yahayba bishaan May 8, 2004 waxaa magaalada Beled-Xaawo ee Gobolka Gedo ka dhacay dagaal ay iskaga horyimaadeen laba kooxood oo labadaba horay uga wada tirsanaa SNF/SRRC.  Dagaalkaas Beled Xaawo ka dhacay waxuu qasaare balaaran usoo jiiday bulshadii Soolmaaliyeed ee magaaladaas ku dhaqnaa iyo kuwii ku noolaa baadiyaha magaaladaasba.

Sida la wada ogsoon yahay, dhibaatada magaaladaas soo gaartay way culus tahay, waxaana ugu darnaa gubashadii la gubay suuqii weynaa ee wax laga gadan jiray ee magaaldada Beled Xaawo, Isbitaalkii Beled Xaawo iyo guryaha qaarkood oo uu dab qabsaday.  Magaalada waxaa ka baxay oo naftooda ugala cararay dad fara badan oo ayagu ku bara kacay dagaalkaas mecno darida ah ilaa iyo haddana ku dhibaateysan xuduudaha saddexda wadan ee Somalia, Kenya iyo Ethipia.

Sida caadada ahba, markii ay goobi ka dhacaan waxyaabo masiibooyin ah sida: Colaadaha, abaaraha, dhulgariirada, dabeylaha duufaanada wata iyo jirooyinkaba, cidda ugu horeysa ee halkaas warka kasoo tebisa waa weriye-yaasha u shaqeeya hey'adaha war tebinta.  Sidoo kalena, weriye yaashu waxay soo tebiyaan haddii ay goobtaasi ka dhacaan waxyaabo faa'iido u leh horumarka bani aadamka.  Shaqada suxufiga warka soo tebinaaya ayaa ah in uu si madax banaan usoo tebiyo waxa uu arko ama maqlo (asaga/ayada) oo ka (fogaanayo/fogaaneyso) been sheeg iyo wax (asaga/ayada) mustaqbalka dib ugu soo noqonayo.

Akhriste,
Ayada oo sida aan kor kusoo sheegnayba dagaalkii Beled Xaawo ka dhacay uu u dhaxeeyay laba kooxood oo labadaba ka wada tirsan SNF/SRRC, ayaa waxaa dhacday in ay qaar akhriste yaasha yada ka mid ah noo soo gudbiyeen qoraalo ay ku sheegayaan shebekadda Allgedo in aanay ka aheyn dhex-dhexaad dagaalkii ka dhacay Beled Xaawo, ayaga oo aanan noo soo gudbin wax daliil ama cadeyn ah oo ay arrinkaas u hayaan.  Dadka dhaliishaas noo soo jeediyay waxyaabaha ay ka duulayaan oo ugu weyn waxaa ka mid ah, ayaga oo rumeysan in uusan dagaalkaas u dhaxeynin laba garab ee SNF/SRRC ah ee uu u dhaxeeyay laba jifo, sidaas awgeedna ay anaga noo arkeen in aan hal jifo xigsanay. 

Haddii ay qaar akhriste-yaasha yada ka mid ah sidaas wax noogu soo qoreen, maxaa nala gudboon in aan u sheegno?

Marka ugu horeysa, anaga waxaan u sheegeynaa akhriste-yaasha yada in aanan kala jecleyn oo aanan kala xigsaneyn bulshada Soomaaliyeed, gaar ahaan garabka SNF/SRRC ee isaga hor yimid siyaasadda.  Waxaa naga go'an in aan dhejino ama daabacno qoraal kasta oo aan ka helno akhriste-yaasha yada oo aanan ka aheyn qodobada hoos ku qoran:

 1.  Ma dhejino qoraalka haddii aan u aragno in uu liddi ku yahay caqiiqda iyo sharafta Islam-ka guud ahaanba.
 2.  Ma dhejino, qoraalku haddaan u aragno in uu Qof, Qoys ama Qaran aflagaa deynayo ama uu si toos ah iyo si dadbanba meel uga dhacayo.
 3.  Maadaama wixii qaldaad ah ee ku yimaada dhinaca saxaafadda iyo wararka aan qoreyno aan anaga mas'uuliyadeeda leenahay, waxaa naga reeban qoridda wararka aan jirin ee been abuurka ah oo aanay fidintoodu ku wanaagsaneyn aduun iyo aakhiraba.
 

Waxyaabaha aan dhejino waxaa ka mid ah:

 1.  Waxaan dhejinaa qoraalada ay noo soo gudbiyaan wariye-yaasha yada, anaga oo awood u leh in aan wixii tifaftirid ah ama sixid ah ku sameyno, laakiin waa maxay waxa aan ka saxeyno ama ka saareyno hadaan ku aragno?  Wax kale ma'ahan ee waa haddii aan ku aragno mid ka mid ah saddexda qodob ee kor ku qoran oo aan aalaaba dhicin.
 2.  Waxaan dhejinaa oo aan gelinaa qeybta FIGRADO - OPINION qoraalada ay akhriste-yaasha noo soo gudbiyaan oo ayagu ka turjumayo figrado shaqsi ah ee aan ka turjumeyn aragtida Allgedo Online.  Qodobkaan labaad waa dhici kartaa in qoraagu uu ra'yigiisa kaga run sheego ama kaga been sheego, laakiin waxaa iska yar faragelinta aan ku yeelan karno maadaama uu ra'yi qofeed yahay.
 3.  Qoraal kasta ee naloo soo gudbiyo hadduusan wadan magac buuxa iyo email address ma daabacno, waxaana dib ugu celinaa qoraaga noo soo diray qoraalkaas si uu usoo raaciyo magaciisa oo buuxa iyo email address-kiisa, taasna waxaan ula dan leenahay in mas'uuliyadda qoraalku uu yeesho qoraaga figradiisa noo soo diray ee aanan anaga ka Allgedo ahaan wax shaqo ah ku laheyn figradaha ay noo soo gudbiyaan akhristeyaasha yada. 


Maxaan ka aaminsan nahay Saxaafadda Xorta ah?

Waxaan la soconaa in aanay jirin saxaafad la oran karo waa xor 100%, waxaana ku shaqeyneynaa aragtida kor ku qoran ee ah faaf-reebka (censorship) intii karaankayo ah. Waxaan ognahay in uu dal walba leeyahay diintiisa iyo dhaqanadiisa u gaarka ah, taas anaga oo madaxa ku haynana, waxaa waajib nagu ah in aan kala garano waxa ay bulshadayada Soomaaliyeed jeclel yihiin iyo waxa ay neceb yihiin.  Haddana, ayada oo ay intaasoo dhan jiraan, ayaa waxaa haboon in la abuuro website(s) u dhaxeeya bulshada Soomaaliyeed oo aanan cidna ku tiirsaneyn. Waxaa kale oo aan ognahay in shaqada wariye nimo ee aan hayno aanay wada jecleysaneyn dadka oo dhan, taasna waa caadi oo ma jirto shaqo la qabto oo balan qaadi karto in ay umad dhan ka wada raali noqdaan, laakiin waxaa muhiim ah in inta badan kalsoonida dadka loo adeegayo la helo.


Codsi

Bani'aadam baan nahay, oo waxaa qasab ah in uu qaldaad naga dhacaayo ee haddii ay akhristeyaasha yada arkaan qalad aan galnay waxaan ka codsaneynaa in ay si qoraal ah noogu soo gudbiyaan qaladkaas si aan u saxno.  Akhirsteyaasha yada haddii ay rabaan in ay qoraal noo soo gudbiyaan waxay nagula soo xariiri karaan email address-ka allgedo@allgedo.com


Gobo-gebadii:  Haddiiba ay dhacdo in uu akhriste Allgedo dhibsado ama jecleysan waayo qoraalada aan soo bandhigno, gaar ahaan kuwa FIGRADO-OPINION, waxaan kula talineynaa in uu qofkaasi noo soo diro qoraal uu ku faah-faahinaayo sababta uusan u jecleysan qoraalkaas iyo sida uu jecel yahay in wax loo qoro ee ka haboon.  Anaga marka uu qoraalkaas nasoo gaaro waxaan sameyn doonaa in aan qoraalkii hore iyo kan danbe isku garab dhejino, dabadeedna aan bulshaweynta u dayno figradii la quman in ay qaataan ama ku qancaan. 

Sidoo kale, haddii ay akhristeyaasha Allgedo dhibsadaan qoraal lagu soo dhejiyay qeybta wararka (News section), waxay xaq u leeyhiin in ay noo soo diraan qoraal ay ku muujinayaan sida aanay raaliga uga aheyn qoraalkaas, dabadeedna haddii aan aragno in aan dhowr email oo diidmo ah ka helnay akhriste-yaasha yada waxaan ku qasbanaan doonaa in aan qoraalkaas meesha ka saarno, waayo anaga bulshadaan u adeegnaa waana ku qasban nahay waxa ay ayagu rabaan in aan had iyo jeeraale ku dhaqano ama sameyno wixii ay diidaana aan ka fogaano.


Waad mahadsan tihiin.

 

Maamulka Allgedo Online
allgedo@allgedo.com

 

All Gedo Online © 2004 - All Rights Reserved.
contact us at: allgedo@allgedo.com