Luuq, Somalia - Wararka ka imaanaya Degmada Luuq ayaa waxa ay sheegayaan in Maamulka Degmada Luuq uu ka taagan yahay Khilaaf xoogan kadib markii 2-mas’uul oo maamulka degmadaasi siyaabo kala duwan loogu magacaabay ay dhowaan wada gaareen degmada Luuq.
       
Axmed Buulle Maxamed oo horey u ahaa Guddoomiyaha degmada isla markaana jagadaasi hayay in kabadan Muddo 6-sano ah ayaa dhowaan ku laabtay Degmada Luuq wuxuuna isku dayay in hawlihii degmadaasi uu dib u bilaabo hayeeshee Ibraahim Maxamed Xareed (Ibraahim Giirey)  oo bilihii lasoo dhaafay ku shaqeynayay Magaca Guddoomiyaha degmada Luuq ayaa isna ka biyo diiday
arrintaasi sheegayna in isaga uu yahay Guddoomiyaha Sharciga ah ee Degmada Luuq.

Khilaafkani xoogan ayaa soo baxay kadib markii horey uu Madaxweyne C/llaahi Yuusuf u soo saaray wareegto uu Guddoomiyaha Degmada ugu magacaabay Axmed Buulle Maxamed iyadoo muddo kadibna inta uusan soo gaarin Axmed Buulle Degmada Luuq hadana uu soo saaray wareegto kale oo uu ugu magacaabay Guddoomiyaha Degmada Luuq Ibraahim Giirey xilligaasi oo Baydhabo uu
ku sugnaa.

Ma jirto illaa iyo iminka wax go’aan rasmi ah oo ay kasoo saareen odayasha dhaqanka Degmada Luuq isku qabsashadaan Maamul ee u dhaxeeya labdaasi mas’uul,  hayeeshee odayaasha dhaqanka iyo wax garadka Degmada Luuq ayaa waxaa hadda u soconaya shirar, taasoo la filaayo in ay dhowaan go’aamin doonaan cidda noqon doonta  mas’uulka dhabta ah ee Degmada Luuq.

 

Xafiiska Muqdisho
Allgedo News Media Network
allgedo@allgedo.com