Waxaan salaamayaa dhamaan ummada Soomaaliyeed ee nabad iyo hormarka jecel, si gaar ah REER Puntland oo xaqiiqatan ah dad usoo halgamay dadkooda iyo dalkooda BAARINA u ah. Qoraalkaan dad soomaaliyeed iyo beel Soomaaliyeed in wax loogu dhimo ama lagu jaa’ifeeyo ma aha ujeedadu. Waxaa wax la layaabo ah in Puntland iyo dadkeeda oo lagu yaqaanay ineey soomaalida u horseedaan nabad, ilbaxnimada iyo hormarka eey aad ugu hungoobeen wax loogu yeero maamul ku sheega uu hogaamiyo ninka magac ahaan Puntland madaxweynaha u ah. Ma jecli inaan cidna wax u dhimo, ama hadal qadaf ah iraahdo. 

Qoraalkan waxaan ugu dan leeyahay waa dhaliil wax lagu saxayo.  Eeba kitaabkiisa wuxuu ku yiri (FADAKIR FA INA DIKRAA TANFACU MU’MUNIIN) Nabi Aloow umada cabsida eebe xasuusi waa intaasoo ay ku waano qaataanee.  Waxaa wax lala yaabo ah ayadoo laga joogo curashadii DGPL mudo 9 sanadood ah in ilaa hada wax adeeg ah oo la xasuusan karo in bulshada reer Puntland eeysan ka fa’ iidin haba yaraatee.  Maamulka Puntland xataa cariish uu umada u dhisay ma sheegi karaan, iskaba daa daaro iyo mashruucyo waa weyn sida riyada Batroolka iwm!!!!.

Miisaaniyada Puntland waxaa qiyaastii lagu sheegaa ilaa 32 milyan oo USD, lacagtaa badankeeda waxeey kasoo xarootaa dakada, airpoorada, baraha kontoroolada, iyo tan ganacsatadu bixiso hase ahaatee, waxaa nasiib daro ah in xoolahaas laga soo aruuriyay xalaal miiratada iyo xoogsatada, hooyooyinka caanaha suuqyada ku gado, laguna xukmay canshuurtii dulsaar badan daalin xeradii aan habayaratee cidna wax loogu qaban.

Waxa Puntland ka dhaco ee boob xoolaha dalka waa wax lagu qoslo, hase ahaatee murtidu waa ka weyntahay in la qoslo. Waxaan kula talinayaa maamulka fadhiidhka ah in eey u hogaansamaan rabitaanka shacabka, hadii xaaladuna sidaa ku socotana ay dhici doonto in reer Puntland ay sameeyaan kacdoon xuquuq raadis ah.  Waxaa haboon in maamul ku sheegu uu si wacan u dhageysto guuxa dad weynaha REER Puntland, gaar ahaan danyarta xalaal miiratada ah.  

Maamulka Puntland ka taliyo wuxuu dadweynaha ku maaweeliyaa dalka waxaan ka hirgalineynaa Mashaariic hormarineed iyo shidaal qodid!!! Xaqiiqatan waa wax lagu maadeysto.  Ninbaa yiri ma anaa waalan mise cadanbaa laga heesi, qof walboo caqli u saaxiib ah wuxuu ogsoon yahay in maamulku ku fashilmay inuu xataa iskuulo dhiso ama howlihii yaryaraa ee dowlada hoose uu hirgaliyo, dal aan xataa amnigiisa la sugin, waxbarasho iyo caafimaad wax ku ool ah la heyn, qorshe magaalo, iyo mashaariicada ilaha dhaqaalaha warkood daa.  See ku dhici kartaa in dad shisheeye u maal gashato?  Dadka waxaa kaloo lagu maaweeliyaa in ay wufuud dalal kale ka yimaadaan si ay Puntland u maal gashtaan.  Runta naxdinta leh waxaa weeye in ragaa wufuud lagu sheegayo ay yihiin rag dano gaar ahaaneed ka leh qolyaha maamulka majara u hayo.

Inntaan sheekooyinkaan mashaariicada Puntland la soconay waxaan baranay rag badan oo kala magacyo iyo midabyo duwan sida MUDANE dulaal TERRY, maantana waxaa la hadal hayaa AL-JAABIR. Arintuba waxeey kusoo koob meeysaa qowda ma qashii waxna ha u qaban. Maamulku intuu jiray waxaa uu dadka u balan qaaday doorashana ku galay inuu dalka hormarin doono 2-3 sano ee ugu danbeysay magaalooyinka waa weyn ee PUNTLAND.  Waxaaa la hadal hayay mashaariicda hoos ku qoran oo runtii hadii la fulin lahaa wax ku ool ahaan lahaa dadweyne badana ay shaqooyin iyo dhaqaale ka heli lahaayeen:-

Waxaa diyaariyay:

Saalax Siciid
Gudoomiyaha Ururka
Puntland Aid Service PAS (Denmark)
Abdi65@hotmail.com
0045 26 56 72 64
 

Afeef: Fariinta uu wato qoraalka sare waxuu gaar u yahay qoraha uu magaciisa kor ku qoran yahay.



Allgedo News Media Network
allgedo@allgedo.com