Qoraal Allgedo horay loogu daabacay March 21, 2007 oo uu cinwaankiisu ahaa "Mas'uuliyiin ay ka mid yihiin Cusmaan Cali Caato, Col. Bare Aden Shire (Bare Hiiraale), Xasan Shaati-gaduud iyo kuwo kale oo badan oo la sheegay in la xanibay dhaq-dhaqaaqooda iyo Xuseen Maxamed Caydiid oo la sheegay in ay adag tahay in uu dib uga soo noqdo safar uu ku tagay Abu dhabi" ayay wax badan iska soo tarayaan. 

Weli waxaa jira warar sheegaya in ragga kor ku qoran oo dhan iyo kuwo kale oo ka tirsan Dowladda KMG ah in aanay u madax banaaneyn fulinta waajibaadka howlihii loo xilsaaray.

Dhanka kalena, Xuseen Caydiid oo ah Ra'isul wasaare ku xigeenka 1-aad ee Dowladda KMG ah, isla markaana ah Wasiirka Howlaha Guud iyo Guriyeynta ayaa waxuu maalintii shalay aheyd ka degay garoonka diyaaradaha ee magaalada Casmara ee wadanka Eretrea.

Caydiid oo ka hor inta uusan ku biirin maslaxa siyaasadeed ee arrimaha Soomaaliya ahaan jiray askari ka tirsan ciidanka Mariineysaka ee dalka Mareykanka, isla markaana haysto dhalasho Mareykan ayaa waxuu intii muddo ah ku jiray qaanadda ay ku bahoobeen xulufada Itoobiya oo ka kooban: Itoobiya, USA, Kenya, Ugaandha iyo Dowladda KMG ah.

Mr. Xuseen oo ah nin da' yar ee aan laheyn waayo aragnimo siyaasadeed ee sidaas usii fog, balse si sahlan ugu soo booday maslax siyaasadeedka Soomaaliyeed markii uu aabihii dhintay ayaa hadda waxaa lasoo gudboonaatay xal u helidda siyaasaddii ugu adkeyd intii uu ku dhex jiray arrimaha siyaasadaha murgsan ee Soomaaliyeed.

Xuseen Caydiid, hadda waxaa hor yaala in uu AFAR KOOXOOD oo isku haya arrimaha Soomaaliya oo ay labo yihiin kuwo caalami ah labana yihiin kuwo Soomaali ah uu KOOXDIIBA mid ka doorto kuwaasoo kala ah:-

LABADA KOOXOOD EE CAALAMIGA AH:-

 1. KOOXDA  A: Itoobiya, USA, Ugaandha, Kenya, iyo Dowladda KMG ah ee uu isagaba ka tirsan yahay.
 2. KOOXDA  B: Eretrea, Jaamacadda Carabta, EU, Suudaan iyo Jabuuti.

LABADA KOOXOOD EE SOOMAALIYA:

 1. KOOXDA C:  In uu tixgeliyo balamihii asaga iyo madaxweyne Cabdulahi Yuusuf u dhexeeyay ee la xariiray is xulufeysi ku dhisan dhinaca deegaanka iyo kii ay jifadiisa (Sacad) la gashay jifada ay deegaan wadaagga yihiin ee (Cumar Maxamuud) ee isna ku saabsanaa muhiimadda ay leedahay in ay labadaas jifo iska kaashadaan dhinacyo dhowr ah oo ay ugu horeyso tan siyaasadaha ku wajahan amuuraha Soomaaliya.
 2. KOOXDA D:  Iyo in uu tixgeliyo kuna camal falo baaqyada uga imaanaya bahweynta Hawiye inteeda badan oo iyagu u arko in waxa ka danbeeya gumaadka arxan darada ah ee ay Itoobiyaanka iyo ciidanka Dowladda KMG ah ka wadaan shacabka Muqdisho uu yahay Cabdulahi Yuusuf oo ah nin Daarood ah oo doonaya in uu ku aarsado awoodda Itoobiyaanka.

Caydiid kaddib markii uu turubka dhan walba u tuuray. Kaddib markii uu tix geliyay in waxa uu markii horeba ku soo galay dowladda KMG ah ay tahay qaab qabiil oo ah 4.5. Kaddib markii uu sii saadaaliyay in tubta ay Cabdulahi Yuusuf iyo Geedi ku socdaan aanay caaqiibo fiican reebi doonin, ayaa waxaad moodaa hadda in uu u janjeersaday dhanka KOOXDA  (B) oo ka kooban Koox Caalami ah iyo KOOXDA (D) oo ka tisan Xoox Soomaali ah.


Caqabadaha Xuseen Caydiid ka hor imaan doono haddii uu ku biiro Kooxaha B & D

 1. Xuseen Caydiid waxuu muddo dheer ku xirnaa oo uu la shaqeynayay dowladda Itoobiya. Waxuu og yahay siro badan oo ka dhaxeeyay Itoobiya iyo dowladda KMG ah, sidaas daraadeedna Itoobiyaanku marna raali kama noqon doonaan in uu Xuseen Caydiid si toos ah & si dadban toona uga soo horjeesto.
 2. Sida la wada ogsoon yahay, dowladda Itoobiya waxay gacan saar dhinacyo badan leh leeyihiin dowladda Mareykanka oo uu Xusaan Askari Mariineysa ah ka ahaa, sidaas awgeedna, Mareykanka qudhiisa raali kama noqon doono in uu Xuseen Caydiid ku biiro kooxaha muraacardka ku ah howlgalada Soomaaliya ee ay gar wadeenka ka tahay dowladda Itoobiya.
 3. Ku biiridda kooxaha mucaaradka ah ee uu xiligaan ku biiro Xuseen Caydiid waxay saameyn ku yeelan kartaa dadka deegaan wadaagga ah ee Sacad iyo Cumar Maxamuud, waxaana lagaba yaabaa in ay gobolkaasi soo wajahdo degenaasho la'aan dhinacyada siyaasadda iyo nabad-gelyada ah amaba ay sii kala jajebiso siyaasadda beesha Sacad oo horayba ugu kala fogeyd dhanka siyaasadaha Soomaaliya ku wajahan. 

Guulaha la oran karo Xuseen Caydiid wuu gaarayaa haddii uu waqtigaan adag ku biiro kooxaha mucaaradka ku ah dowladda KMG ah waa:-

 1. In uu cafis ka helo inta badan umadda Soomaaliyeed isla markaana ay sumcada uu ku leeyahay bulshada Soomaaliyeed dhexdeeda ay kor usoo kacdo.
 2. In ay noqoto guul usoo hoyatay dowladihii mucaaradka ku ahaa siyaasadaha ay Itoobiyaanka garwadeenka ka yihiin sida: Eretrea, Suudaan, Jabuuti, Jaamacadda Carabta & EU-da oo dhamaantood si toos ah iyo si dadbanba uga soo horjeeday siyaasadda Meles Zenawi uu garwadeenka ka yahay ee dhalisay burburkii golihii Maxaakiimta soona dedejisay in ay Itoobiyaanka Soomaaliya qabsadaan.

Si kastaba arrintu ha ahaatee, waxaa xaqiiqo ah in maanta Xuseen Caydiid ay soo wajahday caqabad adag oo siyaasadeed, balse la arki doono sida uu uga dabaasho amuurta Xuseen maanta soo wajahday oo u eg LABA DARAN MID DOORO!.



Allgedo News Media Network
allgedo@allgedo.com