Warbixin ku saabsan Iskuulka Burdhubo Primary School.

Shirkii beesha reer Yuusuf uga socday Daableey oo ay go'aano muhiim ah kasoo baxeen

.Daabley

  Beeshan waxay samaysatay Xeer hoosaad iyadoo la eegayo dhacdooyinka hadba soo mara beesha dhexdeeda.
  Beeshu waxay go'aamisay in qofkii qof si kas ah u dilo la dilo iyadoo la waafajinayo sharciga Islaamka.
  In reer Yuusuf uu kala qaaato wixii dhexdiisa ah oo ku dhaca si kama ah, Rafiso (12) halaad, taas oo ku jirto duug iyo sabeen.
  Jifada hoose in ay kala qaadato (7) halaad oo ay ku jirto duugta iyo sabeenta, lana siinayo xaqlaha. 
  Magtu hadii ay tahay mid reer Xassan dhexdiisa ah, rafisadu waa (20) halaad, 10 halaad waxaa bixinaya jifada dhibka geysatay, tobanka kalena jifooyinka kale ayaa bixinaya.

Hadii mag boqol halaad ah ay nagu soo hoyato, jifadii dhibka lahayd waxay bixinaysaa 22 halaad, 78 halaad ee kalena waxaa bixinaya jifooyinka kale ee reer Yuusuf, sida ay u kala bixinayaana waa sidan:-

 1.  Reer Jabriil waxay bixinayaan 14 halaad.
 2.  Cadaawe waxay bixinayaan 14 halaad.
 3.  Abtidoon waxay bixinayaan 14 halaad.
 4.  Baha Aaden Waxay bixinayan 14 halaad.
 5.  Maxamuud Haaruun 12 halaad.
 6.  Reer Caafi 12 halaad.
 7.  Axmed Haaruun 12 halaad.

Wixii dhaawac ah ee Jifada dhexdeeda ah waa sidan:-

 (A)- Daaweyn, Shafashafo iyo Baan intaa ka dib waxaa la bixinayaa Hal buul ka bax ah.
 (B)- Hadii ay dhibanaha ku dhacdo daryeel xumo waxaa la bixinayaa wixii kharash ah ee ku baxay dhibanahaas iyo hashii buul ka baxa ahayd.
 (C)- Hadii dhiig nool uu yahay, dhibkana uu ka yimid jifo reer Yuusuf ka mid ah, loona geystay qabiil kale 10 halaad wixii ka badan waa la isla bixinayaan, wixii 10 halaad gaaro jifada ayaa iska bixinaysa.

GUURKA GABDHAHA REER YUUSUF WAXAA LA ISKU RAACAY SIDAAN: -

 A-  In la fududeeyo guurka gabdhaha
 B-  Xurmada laga bixinayo gabdhaha waa in ay tahay mid aan kalif lahayn.
 C-  Meherka gabadha waa in la siiyaa shuruud la'aan, iyada ayaana xaq u leh cafintiisa.
 D-  Hadii ay tahay (diidoy/naag shido) sharciga ayaa la waafajinayaa, wixii kharash ah oo ninka ka baxayna waa loo celinayaa, waa hadii aanay ninka caruur u dhalin.
 E-  Gabadhii reerowda oo ilma dhashay kadibna qilaaf yimaado ee ay sidaas ku kala tagaan labadii is qabtay, waa la siinayaa gabadha meherkeeda shuruud la'aan, mana jirto wax xoolo ah oo la kala gudanayo.
 F-  Aabaha gabadha dhalay hadii uu reerka dumiyo ama uu si sharci daro ah nin kale ugu dhiso sharciga ayaa la waafajinayaa ninkaas, xoolihii uu horey u qaatayna waa laga gudayaa.
 G- Dhamaanba waxaa la joojiyey wixii gorgortan yaradeed ah, xoolaha la bixinayana waa xurmo aan kalif lahayn.

QAAN SHEEGADKA XOOLAHA LA KALA IRMAANSADO AMA QAAB KALE LOO KALA QAATO SIDA: QOORTA, IRMAANSIGA, IYO GAADIID CESHIGA WAXAA LOO KALA SAARAY LABA QODOB:-

 A-   Xoolaha nool ee la kala qaatay haddii ay dhibaato ula kac ah soo gaarto (si tacadi ah) oo ka baxsan balantii horey loo galay waa lagu leeyahay qofkii amaanada hayey, balse wixii aan tacadi ahayn oo amar alle ku yimaado laguma lahan qofka lagamana gudan karo.
 B-   Neefkii ay la kulanto dhibaato, sida Bahal Dhaawacay, Xanuun ku yimaaado iyo wixii la mid ah oo geeri sababi kara qofkii la kulma oo gawraca laguma lahan wax mag dhaw ah.

XEER HOOSAADKA HOGAANADA DHAQANKA

Shaqsiga ugu sareeyo xaga dhaqanka beesha reer Xasan waa Ugaaska, (ayada oo uu Ugaaska xiligaana yahay Ugaas Maxamed Xasan Yarow), waxaana Ugaaska saran xil aad u weyn oo ay saaratay bulshada, sidaasi darteed waxaan wax ka xusaynaa waajibaadyada laga rabo Ugaaska.

  Isku xirka beesha Xassan Gaashireedle gudeheeda
  Ku xirida beesha Xassan Gaashireedle beelaha kale ee Sade
  Samaynta kormeero joogta ah deegaanada ay cidu degan tahay
  Iclaaminta shirarka guud ee beelaha reer Xassan
  In uu wada shaqayn joogta ah la sameeyo nabadoonada beelaha reer Xassan.
  In uusan go'aan iska qaadan inta badan isagoon la tashan nabadoonadiisa
  Waa in uu yahay mid la shaqeeyo kuna xiran nabadoonada kale ee Sade
  Waa in uu ahaado mid dadka u siman una cadaalad sameeyo
  Waa in uu dabagal joogta ah ku sameeyo wax qabadka go'aanadii la gaaray
  Waa in uu wanaanjiyo xiriirka beesha Sade dhexdeeda iyo darisyadaba
  Waa in uu kasbadaa kalsoonida shacabkiisa
  Waa in uu xiriir la leeyahay maamulada Gobolka iyo kuwa dawliga ahba.

XUQUUQDA UGAASKA

  In lagu sameeyo maalgalin dhaqaale Ugaaska.
  In la xurmeeyo loona hogansamo talada Ugaaska.
  In la ilaaliyo sharafta iyo sumcada Ugaaska.
  In si buuxda oo kalsooni leh loola shaqeeyo.

XEER HOOSAADKA NABADOONKA GUUD EE BEESHA REER YUUSUF

Shaqsiga ugu sareeyo dhaqanka beesha reer Yuusuf waa nabadoonka guud ee beesha, (ayada oo uu nabadoonka guud ee beesha reer Yuusuf ee xiligaana yahay Macalin Aadan Cabdi Gesey) isaga ayaana looga danbaynayaa howlaha beesha reer Yuusuf.

Waajibaadka Nabadoonka guud ee reer Yuusuf:- 

  Waa shirgudoonka guud ee beelaha reer Yuusuf
  Waa qaban qaabiyaha iyo taabagaliyaha shirarka guud ee beesha reer Yuusuf
  Waa isku xiraha nabadoonada beesha
  Waa in uu ahaadaa dhexdhexaad cadaali ah
  Waa in uu kasbadaa kalsoonida beeshiisa
  Waa in uu xiriir la leeyahay nabadoonada beelaha Sade iyo kuwa kale ee aan dariska nahay.
  Waa in uu xiriir iyo wada shaqayn joogta ah la leeyahay Ugaaska
  Waa in uu wada shaqayn la lee yahay maamulada degmooyinka, gobolka iyo kuwa dawliga ahbaWaa in uu xaliyo khilaafyada beesha dhexdeeda ah, isagoo kaa shanayo nabadoonada kale
  Waa in uu wada shaqayn la lee yahay maamulada degmooyinka, gobolka iyo kuwa dawliga ahba

Xuquuqda Nabadoonka guud ee beesha reer Yuusuf:- 

  Nabadoonka guud waa in la maal galiyo si uu u guto waajibaadkiisa shaqo
  In la xurmeeyo lana qaato talooyinkiisa
  In si aan hagar laheyn loola shaqeeyo si ay u fulaan hawlaha lagu balamay
  In loo sameeyo ku xigeen ama la taliye waaya arag ah
  Waa in uu goob joog ka ahaadaa wareejinta iyo qaadida magaha reer Yuusuf

Waa jibaadka Nabadoonada beelaha reer yuusuf:-

  Waa in uu beesha dhexdeeda ku leeyahay kalsooni
  Waa in uu yahay nin hal abuur leh
  Waa in uu xiriir la leeyahay nabadoonka guud ee beesha
  Waa in uu ka hormariyo dantiisa mida guud ee bulshada
  Waa in uu lee yahay laba kuxigeen oo la shaqeeyo
  Waa in uu yahay mid cadaalad ah oo beeshiisa ku xira beelaha kale ee reer Yuusuf
  Waa in uu la socdo isbadala iyo wacyiga jira
  Waa in uu xaliyo dhamaanba culaysyada soo wajaha beeshiisa
  Waa in ay xiriir shaqo kala dhaxayso nabadoonada kale
  Waa in uu ilaaliyaa balamada iyo shuruucda lagu heshiiyey
  Nabadoonku waa in uu xaliyaa wixii dhibaato ah ee uu kala kulmo beesha reer yuusuf dhexdeeda.
  Waa in uu kula dhaqmaa wanaag iyo horumar beesha Sade dhexdeeda iyo beelaha kale ee dariska ahba

XUQUUQDA NABADOONADA      

  Jifo kasta waa in ay maalgaliso nabadoonkeeda
  Waa in loo fududeeyo waajibaadkiisa shaqo
  In la taageero laguna xurmeeyo mas,uuliyada uu u hayo beesha.
  In laga difaaco dadka xun xun ee ka hor imaanayo habsami u socodka sahqada nabadoonka
Nabadoon kaste isaga ayaa laga rabaa dhamaanba xuquuqda lagu leeyahay beeshiisa.
  Nabadoonka guud iyo nabadoonada kaleba waxay matalayaan golaha guurtida beesha reer Yuusuf.

Magacayada Gudiga Saxiixay Go'aanadan:-

1- Ugaas Maxamed Xasan Yarow -----------------------------------------
2- Nabadoon Macalin Aadan Cabdi Gesey -----------------------------------------
3- Sheekh cali Xasan Ibraahin -----------------------------------------
4- Macalin Cabdi Madaxey -----------------------------------------
5- Nabadoon Muxumed Cali Dhuumaal ----------------------------------------
6- Barre Ismaaciil Macalin ----------------------------------------
7- Muxumed Kheyr Aaden Dabow ----------------------------------------
8- Cali Cabdi-samad Yuusuf ----------------------------------------
9- Mahad Macalin Cismaan ---------------------------------------
10- Muxumed Daahir Cabdiile ---------------------------------------
11- Cabdulaahi Cismaan Xaaji ---------------------------------------
12- Sanay Nuur Xiiray --------------------------------------
13- Ibraahin Aaden Xuuriye --------------------------------------

Ku Xigeenada Nabadoonada:-

14- Muude Muxumed Xareed -------------------------------------
15- Macalin Xuseen Axmed -------------------------------------
16- Cabdulaahi Shiidow Ibraaahin -------------------------------------
17- Maxamed Dhoore Caymow ------------------------------------
18- Maxamed Maxamuud Suuley -----------------------------------
19- Cismaan Axmed Dhakaley -----------------------------------
20- Macalin Daa'uud M. Diiriye ----------------------------------
21- Aadan Cismaan Cabdi ---------------------------------
22- Xuseen Saalax Aadan ----------------------------------
23- Sh. Xasan Bashir Cismaan ----------------------------------
24- Dhuubow Cali Xassan ----------------------------------
25- Xaaji Muxumed Sharmaarke ----------------------------------
26- Cabdulaahi Dhoore Cismaan ---------------------------------
27- Hire Aadan tay ---------------------------------
28- Maxamed Cabdi Axmed ---------------------------------
29- Xassan Codey Axmed ---------------------------------

Daa'uud Aadan 
daauud_4@hotmail.com

Allgedo News Media Network
allgedo@allgedo.com

                            Allgedo  Online © 2006 - All Rights Reserved.                        
 Contact us at: allgedo@allgedo.com