Kismayo, Somalia - Munaasabada maalinta  ay xorminada qaateen gobolda Waqooyi ee dalka Soomaaliya ayaa manta waxaa kasoo qeybgalay qaar ka mid ah ururada bulshada Rayid ah ee Kismaayo, xubnaha maamulka gobolka iyo degmada, iyo hogaamiyaal dhaqan.
 
Xafladaani oo aheyd midaan  loo soo agaasimin sidii lagu aqoon jiray ee looga xusi jirey Jubada Hoose 26-ka Juun ayaa waxaa ka mid ahaa dadkii ka hadlay hogaamiyaal dhaqan oo uu ka mid yahay Samow Maxamed  oo ah nabadoon ka mid aha nabadoonada Jubbada Hoose oo ka taariikheeyay dhibaatooyinkii loo soo maray xornimo doonka iyo sidii ay umada Soomaaliyeed ay ugu guuleysatay markii dambe hadafkoodii, isagoo ilmeynaayo ayaa hogaamiyahaasi dhaqan uu manta ka sheekeeyey siday ahayed isku duubnidii iyo Isjeceylkii umada Soomaaliyeed.
 
Gudoomiye kuxigeenka gobolka Jubbada Hoose Axmed Cabdi Cumar (Sandheere) oo isna ka hadalay munaasabadaasi ayaa ka codsaday hogaamiye-yaasha dhaqanka gobolka in ay u istaagaan xal ka gaarista xiisadaha Kismaayo iyo guud ahaanba gobolka isagoo ku eedeyey oday dhaqmeedku in ay yihiin kuwa ka mas'uulka ah dhibaatada wax ka qabad la'aanta arimaha murusan ee gobolka gaar ahaana colaadaha kala irdheeyey maamulkii DFK iyo Shacabkiiba.
 
Dhinaca kale, xiiasado colaadeed oo geystay Qasaaro dhimasho iyo dhaawac ayaa ka soo cusboonaaday tuulada Beerxaani ee G/J/Hoose.
 
Tuulada beerxaani ee iyadu galbeedka kaga beegan magaalada Kismaayo 60 Km ayaa waxaa ka soo cusboonaday colaadihii beelaha. Inta la ogyahay waxaa ku geeriyooday dagaal halkaasi ku dhex maray laba malayshiyo beelood oo Reer miyi ah galinkii dambe ee shalay hal ruux, waxaana ku dhaawacmay laba kale oo haatanba la soo dhigay Isbitaalka magaalada Kismaayo.
 
Xiisadahaani ka taagan deegaankaasi Beerxaani ayaa Ugaaska Beesha Gaaljecel - Ugaas Rashiid Dhure Cumara waxaa uu ku eedeeyay beesha Sade in ay lahaayeen weerarka shalayto dhacay waqti la kala saxiixday heshiis hordhac ah oo xabad joojintu ay ugu horeysay.

Dhinaca hogaamiyaasha beeshasi edeymaha loo soo jeediyey ayaa ka gaabsaday in ay ka hadalaan eedeymahaasi.  Xiisadaha deegaankaasi miyiga ah ee Beerxaani ayaa hari la' muddo, waxayna kusoo beegantay dhacdadaani waqti hogaamiyaasha beelaha kale ee Soomaaliyeed ay isku dayayeen daminta xiisadahasi.