Muqdisho, Somalia - Maamulka Degmada Baardheere ee Gobolka Gedo ayaa qeylo dhaan ka soo saarey xaalada ay haatan ku sugan tahay Buundada Deg. Baardheere oo weli qeybo ka mid ah ay go'an yihiin maalintii 8-aad, iyadoo ilaa iyo haddana ayan jirin cid ama Hay'ad isku xilqaantey inay arintaasi wax ka qabato.

Gudoomiyaha Degmada Baardheere Bare Cabdi Ismaaciil oo maaanta shir jaraa'id ku qabtey Xafiiskiisa ayaa ugu horeyn ka warbixxiyey xaalada Buundada Baardheere ay mareyso iyo sida loogu baahan yahay in dib u dhis lagu sameeyo qeybaha ay ka burburtey Buundada, waxuuna dhinaca kale ka codsadey Hay'adaha Samafalka Caalamiga ah iyo Jaaliyadaha Beesha SADE ee dalka dibadiisa inay gacan ka geystaan sidii loo dhisi lahaa Buundada.

Gudoomiyaha Deg. Baardheere Bare Cabdi Ismaaciil ayaa sheegay in xaalada deegaanku ay meel halis ah taagan tahay, isagoo sheegay in Badeecadii Ganacsiga iyo xoolahii ka imaanayey deegaano ka tirsan Gobolka Gedo iyo wadamada deriska ah in ay hakiyeen xaalada ay ku sugan tahay buundada Baardheere oo laga cabsi qabo in ay faraha ka baxdo haddii ay sidani ku sii socoto;  arimahaasi oo uu sheegay inay sii adkeeyeen nolosha deegaanka.

Gudoomiyaha oo hadalkiisa sii wata ayaa waxuu yiri "Ma jiraan ilaa iyo hadda howl la taaban karo oo dib u dhis loogu sameynayo qeybahii ay ka go'dey Buundada", isagoo dhinaca kalena soo hadal qaadey gudi ka kooban 14 Xubnood oo dhowaan loo saarey inay soo qiimeeyaan xaalada Buundada iyo sida wax looga qaban karo, balse ilaa iyo hadda ayan gudigaasi ku guuleysan howlahii loo xil saaray.

Buundada Baardheere oo ayan hadda mari karin Gaadiidka waaweyn ee ganacsiga iyo kuwa yaryar ayaa dadweynaha Baardheere waxaa soo wajahay cabsi xoogan, xilligani oo roobabkii Deyrta ay ka curteen qeybo ka mid ah Gobolka Gedo.


Axmed Cumar Saalixi - Baardheere-Gedo/Soomaaliya.




Allgedo News Media Network
allgedo@allgedo.com