Muqdisho, Somalia - Afhayeenka Ra’isalwasaaraha Itoobiya Simon Berket oo Magaalada Adis Ababa kula hadlayey saxafiyiinta ayaa la waydiiyey wararka warbaahinta caalamka baahinayso ee ku aadan ciidamo Itoobiyaan ah oo ku dhintey dagaaladii ka dhacay Muqdisho, waxaana uu sheegay in ugu yaraan 5 ka mid ah ciidamada Itoobiyaanka lagu diley dagaaladii ka dhacay Muqdisho, waxaana uu sheegay in dagaalkaasi uu ahaa mid ay ciidamada Itoobiyaanku la galeen kooxda Al-Shabaab iyo wax uu ugu yeeray kooxo argagixiso ah.
 
Simon Berket wuxuu sheegay in ciidamada Itoobiyaanka ay u joogaan magaalada Muqdisho hawgal amaan sugid ah oo ay ku gacan siinayaan ciidamada DFKMG ah ee Soomaaliya oo uu sheegay inay waydiisatey inay gacan siiyaan, isla markaana ay gudanayaan hawshii laga codsadey ee amaan ku soo celinta magaalada Muqdisho, waxaana uu sheegay inay jiraan kooxo qabaa’il oo si qaldan u fahmay hawsha ciidamada.
 
Hadalkan ka soo yeeray Afhayeenka Ra'isal wasaaraha Itoobiya ee uu ku qirey dhimashada soo gaartey ciidamada Itoobiyaanka Muqdisho ayaa ku soo aadaysaa iyadoo maalmihii ugu dambeeyey dagaalo qaraar oo ka dhacay magaaalda Muqdisho ay ku dhinteen in ka badan Boqol qof oo isugu jira dad Rayid ah ee aan dagaalada Muqdisho ka socda lug ku laheyn, ciidamo Itoobiyaan ah iyo kooxihii ka soo horjeeday.


Allgedo-News



Allgedo News Media Network
allgedo@allgedo.com