G/Haarey, Somalia - Xubnaha Wasaaradda Arrimaha Gudaha ee Dowladda KMG ah ee haatan ku sugan magaala madaxda Gobolka Gedo ee Garbahaarey ayaa waxba kama jiraan kasoo qaaday natiijooyinkii doorasho ee kasoo baxay Degmooyinka Gobolka Gedo, marka laga reebo Degmada B/Xaawo. 

Go'aankaankaan kasoo baxay xubnaha Wasaaradda Arrimaha Gudaha ee DKMG ah ayaa ka danbeeyay kaddib markii ay beryahaan soo baxayeen warar sheegayay in ay jiraan dad shaqsiyaad ah oo iyagagoo ujeedooyin gaar ah wata doonayay in ay marin habaabiyaan habsami u socodkii howlaha maamul u sameynta Gobolka Gedo.

Dhanka kale, magaalada G/haarey ayaa waxaa beryahaan kusoo qul-qulayay mas'uuliyiin ka kala socday waaxda Horomarinta Dowladaha Hoose ee Wasaarada Arimaha Gudaha DKMG,  Hay'adda UNOPS/LGD iyo qaar ka mid ah Odayaasha dhaqanka ee beelaha Sade ee Degmooyinka Gobolka Gedo.

Isku soo wada duuboo, waxa haatan la sugaaba waa natiijada kama danbeysta ah ee ay sida wada jirka ah u soo saari doonaan mas'uuliyiinta ka socda Wasaarada Arrimaha Gudaha ee dowladda KMG ah iyo odayaasha dhaqanka beelaha Sade ee haatan ku sugan magaalada G/Haarey.


Shucayb Shire,  Allgedo-Baydhabo.

Allgedo News Media Network
allgedo@allgedo.com