Baardheere, Somalia - Qorshe la doonayey in maamul loogu sameeyo degmada Garbahaarey ayaa khilaaf xoogani uu ka dhashey ka dib markii qaabka wax loo qeybsanayo xubnaha maamulka cusub ay isku qabteen qaar ka mid ah beelaha dega deegaankaasi.

Isku dayo lagu doonayey in khilaafkaasi lagu xaliyo oo baryahii lasoo dhaafey degmadaasi ay ka wadeen xubno ka tirsan Wasaarada Arimaha gudaha DKMG ayaa lagu guul dareystey, iyadoo xubanhii ka socdey wasaaradasina ay u ambabaxeen Magaalada Baydhabo kaddib markii arinta khilaafkani uu maqley Madaxweynaha DKMG oo sheegay in arimahaasi looga hadli doonoBaydhabo maalmaha soo socda.

Madaxweynaha oo iminka ku sugan Magaaglada Baydhabo ayaa sheegay in arimaha ka taagan Gobolka Gedo ee khilafka maamul u sameynta uu kulamo iyo wadatashiyo uu kala yeelan doonoXubanaha Wasiirada iyo Xildhibaaanada ka soo jeeda Gobolka Gedo, isagoo u sheegay wafdiga wasaarada Arimaha Gudaha inay joojiyaan howlahaasi islamarkaana ay soo galaan magaalada Baydhabo.

Xudunta khilaafka soo kala dhex galay howlaha maamul u sameynta degmada Garbahaarey ayaa waxa la sheegayaa inay ku lug leedahay qaabka loo qeybsanayo xubanah maamulka oo ka kooban 33 Xubnood oo ay horey u shaxeeyeen Mas'uuliyiin ka tirsan Garbahaarey, iyadoo qaar ka mid ah beelaha dega degaankuna xubanhii kaga soo aadey qeybtaasi ay sheegen inysan ku qanacsanayn qeybtaasi, isla markaana la daba maray nidaamkii saxda ahaa ee la rabay in wax lagu qeybsado.

Xubnaha ka socda Wasaarada Arimaha Gudaha ayaa waxay sheegeen inay haboon tahay in dhisdmaha la waafajiyo nidaamkii ahaa in Boqol xubnood oo wax doorta la sameeyo, hase ahaatee qaar ka mid ah odoyaasha dhaqanka iyo wax garad kale ayaa sheegay in xilligan dhaqaalo aanan loo hayn howshaasi.

Si kastaba ha ahaatee, waxaa laga dhursugayaa natiijooyinka ka soo bixi doona kulamo dhowaan ka dhici doona magaalada Baydhabo oo la doonayo in arinkaasi lagu xaliyo.



Axmed Cumar Saalixi, Baardheere/Gedo.

Allgedo News Media Network
allgedo@allgedo.com