Laascaanood, Somalia - Wararka laga helayo dhinnaca Magaalada Laascaanood ee Gobolka Sool ayaa sheegaya in saaka aroortii ay gudaha Magaaladu isaga baxeen ciidamada Maamulka la magac baxay Somaliland ee maalmihii ugu dambeeyey gacanta ku hayey magaaladaasi.

Mid ka mid ah Dadweynaha magaaladas oo ka gaabsadey magaciisa ayaa sheegay in ciidamada maamulka Somaliland ee xooga ku haystey magaalada Laascaanood ay saaka waaberigii isaga baxeen gudaha magaalada iyagoo u ambabaxay duleedka magaalada, iyadoon la ogeyn sababaha rasmiga ah ee ciidamada Somaliland iyo maleeshiyaadka taageersan ay uga ambabaxeen magaalada.

Dadweynaha magaalada Laascaanood ayaa markii ay soo tooseen waxay ku waaberisteen maleeshiyaadkii taageersanaa maamulka Somaliland oo gabi ahaanba isaga baxay deegaanadii ay kaga sugnaayeen magaalada Laascaanood, waxaana arimahaasi lagu macneeyey inay tahay cabsi iyo walwal soo foodsaarey ciidamada maamulka Somaliland, kaddib markii ay xoogeysteen dhaqdhaqaaqa ciidan ee uu gobolka ka wado maamul Goboleedka Puntland oo diyaarinaya weerar ka dhan ah maleeshiyaadka maamulka la magac baxay Somaliland si looga saaro magaalada Laascaanood.

Jidadka soo gala magaalada Laascaanood ayey dadweynaha magaalada waxay ku soo celiyeen dhagaxaantii iyo jidgooyooyinkii ay horey uga qaadeen ciidamada maamulka Somaliland, waxaana maanta gabi ahaanba kacsan jawiga magaalada Laascaanood maa jirto ilaa iyo hadda wax war ah oo ka soo axay labada maamul ee isku haya magaaladaasi.


Allgedo-News



Allgedo News Media Network
allgedo@allgedo.com