Muqdisho, Somalia - Inta badan wadooyinka soo gala magaalada Muqdisho ayaa maanta xiran, iyadoo xirnaashaha wadooyinkaasi ay sababeen in dadkii ka barakacaya magaalada Muqdisho ay waayaan wado ay ku baxaan oo ay uga cararaan dhibaatooyinka ka soconaya magaalada Muqdisho.

Wadooyinka xiran ayaa waxaa ka mid ah wadada wadnaha, Warshadaha iyo 30 ka, halkaasi oo ay ku sugan yihiin ciidamada dowladda iyo kuwa Ethiopia oo baaritaano ay ka wadaan.

Howlihii ganacsi ee suuqa Bakaaraha ayaa saaka aroortii xiray, iyadoo ciidamada dowladda ay gudaha u soo galeen, waxaana meelaha qaar ay ka wadaan howl-gallo baaritaano ah. Ciidamada Ethiopia ayaa lagu soo waramayaa in iyana ay soo gaareen qeybo ka mid ah wadad warshadaha iyo wadada 30 ka ee Muqdisho. Dhinaca kale:  Axmed Diiriye Max’ed oo ahaa Afhayeenkii Garab ka mid ah golaha dhaqanka iyo midnimada beelaha Hawiye isla markaana ku eedeyay DKMG ah iyo ciidamada Itoobiyaanka inay Magaalada hawlgalada ay ka wadaan magaalada Muqdisho ayaa maanta xabsiga loo taxaabay.  Axmed Diiriye ayaa waxaa maanta gurigiisa oo ku yaal gudaha Suuqa Bakaaraha tagey ciidamo ka socdey DFKMG ah oo ku hubaysnaa gaadiidka dagaalka waxaana xoog ay ku galeen gurigiisa, iyagoo kaxaystey Axmed Diiriye, laba wiil oo uu dhaley iyo waliba xubin ka mid ahaa golaha dhaqanka Beelaah Hawiye ee Axmed Diiriye afhayeenka u yahay oo lagu magacaabo Sheikh Axmed Cali Gees.

Ma jiro wax war ah oo ka soo baxay maamulka Gobolka Banaadir oo ku aadan xariga Axmed Diiriye Max’ed inkastoo Max’ed Dheere oo ah Gudoomiyaha Gobolka Banaadir uu ugu eedeeyey Max’ed Xasan Xaad iyo Axmed Diiriye inay ka dambeeyaan qaraxyada iyo rabshadaha ka socda magaalada Muqdisho, isagoo tiro ka dhawr ugu hanjabay inay ka jawaabi doonaan ficilada ay ka wadaan Muqdisho oo waa sida Max’ed Dheerer hadalka u dhigay’e ay ku gacan siinayaan kooxaha nabad diidka ah ee Muqdisho dhibaaatada ka wada.


Xafiiska Wararka Allgedo ee Muqdisho-Soomaaliya.



Allgedo News Media Network
allgedo@allgedo.com