Baydhabo, Somalia - Xildhibaannada baarlamaanka Federaalka Soomaaliya ayaa shaley u codeeyey qorshihii uu watay Madaxweynaha DKMG ah ee Soomaaliya C/llaahi Yuusuf Axmed iyadoo qorshahaasina ay soo jeediyeen ergooyinkii ka qeybgalay shirkii dib u heshiisiinta ee kal hore lagu qabtay magaalada Muqdisho, iyadoo gabagabadii kulankan xildhibaanada uu ka codsaday Sheekh Aadan Madoobe inay cod gacan taag ah ku meel mariyaan ansixiinta qodobadii ka soo baxay shirka dib u heshiisiinta beelaha oo ay ka mid ahaayeena qodobadaasi in la furo baarlamaanka lagana soo doorto wasiirada dowladda meel ka banaan 275-ta xubnood.

Maxamed Qanyare oo ka mid ah siyaasiinta ugu af adag xildhibaanada DKMG ah ayaa baarlamaanka ka hor sheegay in ay ka tanaasuleen mowqifkooda ahaa inay ka hortagi doonaan ka hadalka qodobka ah in Baarlamaanka uu aqbalo in Xubnaha Wasiirada laga soo xulo Soomaalida kale ee aan baarlamanaka ka mid ahayn.

Madaxweynaha Soomaaliya C/llahi Yuusuf Axmed ayaa hadda looga fadhiyaa inuu soo magacabo Ra’iisal Wasaare cusub oo bedela Ra’iisal Wasaarihii hore ee shaqada ka tagay, isagoo aan ka soo xulaynin Baarlamaanka balse uu ka soo xuli doono dibadda iyo gudaha Baarlamaanka.


Xafiiska Wararka Allgedo ee Muqdisho-Soomaaliya.




Allgedo News Media Network
allgedo@allgedo.com