Ugaas Cumar Ugaas Xirsi oo ka hadley howlaha dhismaha Maamul u sameynta Gobolka Gedo (Allgedo Online News) - Jimce, November 2, 2007 @ 1:18 am

Baardheere, Somalia - Ugaas Cumar Ugaas Xirsi oo haatan ku sugan Degmada Baardheere ee Gobolka Gedo ayaa markii ugu horeysay ka hadley mowqifkiisa ku wajahan marxalada Gobolku uu marayo ee howsha maamul u sameynta, gaar ahaan khilaafka ka taagan dhismaha maamulda degmooyinka qaar, isagoo dhinaca kalena soo dhoweeyey oo taageeray qorshayaasha maamulo loogu sameynayo Gobolka Gedo oo ay wado Dowalada KMG ah ee Soomaaliya.

Ugaaska oo shaley shir Jaraa'id ku qabtey gurigiisa ayaa ku tilmaamay dib u dhaca xilligani ku yimid howshii maamul u sameynta Degmooyinka Gobolka Gedo oo dhowaan lagu wadey in la soo gabagabeeyo in ay la xariirto khilaaf ku saabsan qaabka wax qeybsiga oo beelaha qaar ay isku maandhaafeen, waxuuna sheegay in khilaafka noocaasi oo kale ah ay haboon tahay in laga gudbo, waxuuna ugu baaqey mas'uuliyiinta
iyo odoyaasha dhaqanka beelaha in ay la yimaadaan tanaasulaad, iyagoo qiimaynaya ayuu yiri baahida ay shacabku u qabaan in ay helaan nidaam shaqeeya oo dadku ay ku qancaan.

Ugaas Cumar Ugaas Xirsi ayaa soo hadal qaadey cabashooyin maalmahii u dambeeyey ka imaanayey beelaha qaar oo saluugsan xubnahii kaga soo aadey waxqeybsiga, ayaa waxa uu sheegay in mar walba ay haboon tahay in dadku si cadaalada ay ku jirto ay wax u
qeybsadaan, islamarkaana laga fogaado waxii bulshada dhexdeeda ka abuuri kara khilaaf.

Hadalkan Ugaaska ayaa ku soo beegmaya xilli maalmahii u dambeeyey uu cirka isku shareeray khilaafyada ka taagan maamulo la filayey in laga sameeyo degmooyin ka tirsan Gobolka Gedo oo dib u dhac uu ku yimid, iyadoo dadka qaarkiina ay ku tilmaameen in khilaafkani uu salka ku hayo beelaha qaar oo isku mari la habka wax loo qeybsanayo.


Axmed Cumar Saalixi, Baardheere-Gedo-Soomaaliya.



Allgedo News Media Network
allgedo@allgedo.com