| HOME | NEWS | FORUM | MAQAALLO | GEDO | FEEDBACK |
 |
 |
|
|
Magaalada Kismaayo markii dalku uu dowlad dhexe lahaa ee beri samaadkii waxa ay ahayd magaalo horumarsan oo leh dhaqaale iyo magac, dadka ku noolina ay ahaayeen dad ka maarmi karay Soomaaliya inteeda kale dhaqaalaha uga imaanayay. Waxaa ku taallay warshad weyn oo hilibka lo'da lagu farsameeyo, waxay lahayd deked weyn oo caalami ah, garoon weyn oo caalami ah iyo dhul beereed aad u wanaagsan oo laga soo saari jiray delegyada kala duwan ee la quuto waxna la dhoofin jiray, xoolaha nool ayaa aad ugu badnaa oo ku dhaqmi jiray dhulkan waamo.
Markii uu dalku burburay waxay magaalada Kismaayo iyo guud ahaan gobolkan Jubbada hoose ay noqdeen meelaha aad loogu hardamo ee ay qabaa'illada iska soo hor jeeda ku dagaallamaan, waxaa la baabi'iyay dhammaan ilihii dhaqaalaha, waxaa la bililiqaystay guud ahaan qalabkii warshadda hilibka iyo dekedda caalamiga ah ee Kismaayo yaallay. waxaana soo haray bulshooyin faqri ku noqday dagaallada sokeeye oo ka qaxi kari waayay magaalada Kismaayo, intii qaxi kartayna waxa ay aadeen dalka Kenya. Xilligii uu general Maxamed Siciid Xirsi Morgan hayay talada magaalada Kismaayo waxa joogay hay'ado tira badan oo samafal oo ka gargaari jiray bulshada dhinacyada caafimaadka, waxbarashada iyo fayadhowrkaba. Markii uu isbahaysiga Dooxada Jubba qabsaday magaalada Kismaayo, waxaa meesha ka baxay gargaarkii hay'adaha caalamiga ah in kastoo horumar weyn laga sameeyay dhinaca is dhexgalka bulshada iyo ganacsiga, haddana weli magaaladu waxa ay tabaysaa horumar in la gaarsiiyo. Dhinaca Nabadgelyada Magaalada Kismaayo tan iyo intii uu isbahaysiga dooxada Jubba hayay waxay soo martay marxalado kala duwan oo ku saabsan dhinaca nabadgelyada, isbahaysigu markii uu magaalada ka qabsaday maamulkii hore ee Gen. Morgan waxa uu isku dayay in uu ku maamulo nidaam jabhadeed, tiiyoo ay malleeshiyooyinku dhex mushaaxayeen magaalada gudaheeda, waxaa ka dhacay dilal fara badan iyo dhaawacyo ay geysteen malleeshiyooyinka isbahaysiga, Isbahaysigu wuxuu markiiba isku dayay sidii uu u xakameyn lahaa malleeshiyooyinka hubka ku dhex wata magaalada Kismaayo, waxana la sameeyay qorshooyin lagu xeraynayo hubka oo malleeshiyooyinka nidaam loogu sameynayo, tallaabadaas waxa ay isbahaysiga u sahashay in uu gacanta ku dhigo ammaanka magaalada Kismaayo oo hubkii lagu dhex wadan jirayna uu noqdo mid lagaba dhex waayo magaalada gudaheeda, arrinkaasna waxa ay dhiirri gelisay in dadweyne badan oo ka shakisanaa ammaanka Kismaayo ay ganacsigooda ula soo hawoodaan Kismaayo. Muddo dhowr bilood ah ka dib ayaa haddana waxaa gacanta ka baxay ammaanka Kismaayo, ka dib markii malleeshiyooyinkii oo ka cabanaya in aanay helin mushaarradii loo qoray ay dhigteen isbaarooyin loogu magac daray (GOGOSHA ISBAHAYSIGA) gudaha magaalada Kismaayo, waxaa dhacday in ay isbaarooyinku isu jiraan tallaabooyin isu muuqda. Mar kale ayuu misana isbahaysiga dooxada Jubba qaaday olole lagu xakameynayo xasillooni darradaan dilka iyo dhaawacyada wadata ee isbaarooyinku la yimaadeen iyadoo isu socodkiina uu adkaaday. Si kastaba ha ahaatee waxaa la yareeyay isbaarooyinkii ka dib markii badankooda la qaaday, waxana isbahaysigu uu sameeyay qorshe lagu dhisayo ciidan suga ammaanka magaalada Kismaayo, iyo in dib loo habeeyo dhammaan mushaar xumidii qabsatay malleeshiyooyinka loona qoondeeyo wax cayiman. Dhaqaalaha Dhaqaalaha magaalada Kismaayo waxa uu ku xiran yahay intiisa badan dekedda Kismaayo, waxaana dekedda ka soo xerooda dhaqaale xoog badan in kasta oo uu dhaqaalahaasi badankiisa aado dalka Kenya oo lagu soo beddesho qaad haddana waxaa muuqata in dhaqaaluhu uu yahay mid heer sare ah, waxaa dekedda ku soo xirta celcelis bishiiba 10 gaadiid ah oo keena bedeecooyin iyo qalab iyo gaadiid kala duwan isla markaasna qaada dhuxusha iyo sisinta oo ah labada aaladood ee ugu badan ee laga dhoofiyo Kismaayo in kastoo imminkana la billaabay in la qaado biraha duugga ah oo la dhoofiyo, haddana - dhinaca ganacsiga waa uu fiican yahay waxana badeecada ka timaadda dekedda Kismaayo iyo weliba magaalada Muqdisho loo kala iib geeyaa gobollada Koonfureed iyo dalka Kenya. Caafimaadka Magaalada Kismaayo ma lahan isbitaal shaqeynaya, waxana isbitaalka weyn ee magaalada uu la il daran yahay daawo la'aan iyo dhakhrat la'aan, mana jirto hay'ad kaalmeysa isbitaalka. Cudurraduna waa ay ku badan yihiin magaalada Kismaayo, maadaama ay dadku biyaha ka cabaan ceelal gacmeedyo guryaha laga dhex qoto haddana ma lahan daryeel ceelshaasu, waxana ay ku ag yaallaan musqulaha. Dadka soo bara kacay ee ku nool buulasha ayaa waxa ay ku badan yihiin gudaha magaalada Kismaayo, waxana inta badan ay ag degaal goobo qashinka lagu daadiyo, taasna waxa ay sababtay in ay cudurro badani ka kala dillaacaan xeryahaas qaxootiga. Tan kalena, nadaafadda magaalada aad ayey u hooseysaa, taasna waxa ay keeni kartaa in cudurro kala duwani ay dhici karaan. Wax barashada Tan iyo intii uu isbahaysigu la wareegay gacan ku haynta magaalada Kismaayo waxaa horumar weyn laga sameeyay dhinaca wax barashada, iyadoo magaaladu ay hadda leedahay 14 iskuul oo si xawli ah u shaqeeyo oo laba ka mid ahi ay illaa heer dugsi sare yihiin. waxaa jira iskuullada qaarkood in ay haystaan manaahijta Carabta halka kuwa kalena ay haystaan manaahijtii Soomaaliya kuwana ay haystaan manaahijta Kenya, haddana marka laga reebo iskuullada private-yada ah waxaa 14 ka kale ee iskuul ay leeyihiin guddoon wax barasho oo mideysan iyo doodo iyo kedisyo u socda. Warbaahinta
Waxaa
magaalada Kismaayo ka jira idaacad FM ah oo madax bannaan oo hadasha 15
saac maalin walba oo sii deysa barnaamijyo kala duwan, sidoo kalena
waxaa magaalada ka soo baxa 3 wargeys oo la kala yiraahdo Sanguuni press
oo maalinle ah kana hadla dhacdooyinka siyaasadda, dhaqanka iyo
dhaqaalaha, Xiddigta Waamo oo maalinle ah kana hadla Siyaasadda
dhaqaalaha iyo isboortiga iyo Ifafaalo Jacayl oo toddobaadle ah kana
hadla arrimaha qoyska iyo jacaylka.
Somalia
Admistrative Map
(Click here)
|
|
All
Gedo Online © 2004 - All Rights Reserved. |