Wariye Yaxye C/Risaaq Soofe oo ka tirsan wariye-yaasha Allgedo ayaa waxaa u suurta gashay in uu wareysi la yeesho Wariye Ahmed Mohamed Adan (Timajilic) oo isagana ka tirsan wariye-yaasha Allgedo oo iminka ku sugan Degmada Luuq ee gobolka Gedo, wareysigiina waxuu u dhacay sidaan:
 

Allgedo:  Uugu horeyn, Ahmed kusoo dhawow shabakadda warbaahinta ee allgedo Online.
 

Ahmed:  Waan dhowahay.
 

Allgedo: Waxaad iiga warantaa xaaladda amniga iyo bulshada ee magaalada luuq.
 

Ahmed:  Magaalada Luuq waa magaalo qadiimi ah isla markaasna ah magaalo ka tirsan gobolka Gedo oo l eg xudduud ay la wadaagto gobollada Bay iyo Bakool, dhanka xaaladdeeda amniga iminka waa uu fiican yahay, dhibaatooyinka dowlad la'aanna waxa ay la qabtaa Soomaaliya inteeda kale.
 

Allgedo:  Waxa aan la soconaa sanadihii la soo dhaafay in ay halkaas dagaalo ka dhaceen hadaba qasaro intee la ek ayeey geesteen?
 

Ahmed:  Dagaalladii sokeeye ee dhowaanahan ka dhacayay degaanka waxa ay geysteen dhibaatooyin naf iyo maalba, waxa ay hoos u dhigeen dhaqaalihii gobolka waxana ay saameyn weyn ku yeesheen dhammaan qoysaska degaanka, waxana adkaatay in si degdeg ah looga gaaro heshiis iyo is dhex gal degdeg ah, waxa ay arrintaasi saameyn weyn ku yeelatay dhinacyada dhaqaalaha, siyaasadda iyo weliba ammaanka guud ee ganacsi.
 

Allgedo:  Maxaa ka mid ah qasaarooyinka?
 

Ahmed:  Waxaa ka mid ah:
1. Dhaqaalaha gobolka oo ay curyaamiyeen, iyada oo ay tageen amaba carareen inta badan hay'adihii samafalka sida (Action Contre la Faim).
2. Waxaa illaa iyo hadda aan si rasmi ah isugu dhafnayn maleeshiyo beeleedyada gobolka, waxana ay kala degeen meelo ama baro u kala gaar ah.
 3. Waxaa jiro barakac guud oo ku yimid qoysas badan oo gobolka degganaa.
 

Allgedo:   Halkuu ku tiirsan yahay ganacsiga magaalada?
 

Ahmed:  Waxa uu ku tiirsan yahay dalalka Itoobiya, Kenya iyo gobollada Bay iyo Bakool iyo caasimadda Muqdisho, waxana laga ganacsadaa dhammaan noocyada kala duwan ee raashiinka iyo dharka iyo daawada,  Xoolaha nool oo illaa Boosaaso la aadiyo iyada oo Beledweyne la sii mariyo iyo noocyada delagga beeraha oo dhan.
 

Allgedo:  Horay waxaad iigu sheektay in ay haayadihii ay ka guureen maxaa sababay in ay haayadaha guuraan?
 

Ahmed:  Inay hay'adaha guuraan waxaa sababay amniga oo xumaaday iyo dagaallo ka dhacay degaanka, waxana adkaatay in ay hay'adaha ka shaqeeyaan degaanka iyada oo baahidii ay dadka ka caawin jireenna ay jirtay.
 

Allgedo:  Hadaba hadii ay hay'adihii dadka caawin jiray ay guureen horayna aad iigu sheektay in ay jiraan dad bara kacay dad kaas yaa caawimaad ku u fidiyo?

Ahmed:  Waxaa caawinaya Ilaahay, laakiin waxaa jira hay'adaha caafimaadka ku shaqada leh oo dib isla markiiba shaqadoodii u billaabay iyo hay'adda CARE oo shamuurey u qaybisa bishiiba mar qoysaska liita ee ugu dhaqaalaha hooseeya degaanka.
 

Allgedo:  Dhinaca kale ma jiraan ciidan u qaabilsan dagmada xaga amniga?
 

Ahmed:  Haa waa jiraa, Degmada Luuq waxaa shaqeynaya ciidankii Booliska, in kasta oo Saldhiggii booliska ee degmadu uu burburay, waxa kale oo jira Maleeshiyo ilaalisa amniga guud ee degmada
 

Allgedo:  Yeey ka mar qaataan ciidamada booliska iyo kuwa malseesiyadaba?
 
 

Ahmed:  Waxa ay ka amar qaataan maamulka degmada Luuq.

Allgedo:  Aad ayaad u mahadsantahay Ahmed.
 

Ahmed:  Adinkaa mudan.

Kaasi wuxuu ahaa Ahmed Mohamed Aadan (Timajilic) oo ku sugan magaalda Luuq ee gobalka Gedo.