Beled-Xaawo, SOMALIA - Waxaa shabakadda Allgedo u suurta gashay in ay wareysi la yeelato ku xigeenka guddoomiyaha ururka SNF/SRRC Col. Baalle Ibraahim Cabdi isaga oo jooga magaalada Beledxaawo ee gobolka Gedo, waxana wareystay weriyaheenna Allgedo ee magaalada Beledxaawo Cabdullaahi Cali Kaalmooy, waxana wareysigii uu u dhacay sidan: -

Allgedo:  Col. Baalle waxaad iiga warrantaa nabaddii aad ka waddeen degaankan Daawo ee ka socotay magaalada Beledxaawo ma dhaqan gashay?

Col. Baalle:  Nabadii ilaa lixda bilood soo jiitameysay waxay dhaqan gashay 5/1/2005 waana Ilaahay mahaddiisa, waxaan isu keennay maleeshiyaadkii ay colaadda ka dhexeysay ee gobolkan Gedo oo aannu heshiis dhex dhignay.

Allgedo:  Yaa idinku gacan qabtay oo gacan idinku siiyay si nabad aad u gartaan?

Col. Baalle: Waxa nabadda iska kaashaday dowladda aan deriska nahay ee Ethiopia iyo ururka SNF/SSRC, iyo weliba odayaasha dhaqanka ee beesha SADE.

Allgedo:  Sida aad ka war qabtaan waxaa dhowaan laga yaabaa in dalka la keeno ciidammo Afrikaan ah, haddaba haddii ay dhacdo in ciidammo Afrikaan ah la keeno dalka sidee ayaad ka Urur ahaan u aragtaan ?

Col. Baalle  Waanu soo dhaweynaynaa ciidamadaas iskaashi baana la sameynaynaa, weliba gacma furan baan ku soo dhaweynaynaa si nabad loogu soo dabbaalo dalka Soomaaliya.

Allgedo: Haddaan ku laabto dhanka Maleeshiyaadka aad isku darteen,  Hadii aad isku darteen maleysiyaadka ma wax dhib ah baa dhexyaala malleeshiyooyinkiina maadama ay horey colaad ugu dhexeysay?

Col. Baalle: Wwax dhib ah oo dhex yaala ma lahan waana heshiisiinay,  keliya waxaa noo daran waa saadkoodii iyo raashiinkoodii sidaan ku heli lahayn, maadaama aanan dhaqaale u haynin.

Allgedo:  Col. Baalle ma ku qanacsan tihiin xubnaha wasiirrada ee hadda la dhisay inta ay ka heshay beesha SADE?

Col. Baalle: Haa waan ku qanacsan nahay maxaa yeelay xil uma aragnee xal baan u aragnaa, wax walbana xalkaa nooga muhiimsan.

Allgedo: Waxa jirta in ay kormeer ku aadayaan qaar ka mid ah ururka SNF/SSRC qaar degmooyinka kale ee gobalka Gedo ka mid ah, arintaa maxa ka jira?

Col. Baalle:  Haa,  waa jirtaa arintaa in ay baxayaan qaar ururka xibnahiisa ka tirsan  oo ay adayaan degmoyinka gobolka.

Allgedo: Wax dhisid ama badelaad ururka iyo maamuladda ka jira degmooyinka uu ka taliya ururka SNF/SSRC ma jiraan arintaa?

Col. Baalle: Weli ma jiraan hadda, laakiin horta ha hirgasho nabada hadda la wada oo socota  kadib haa.

Allgedo: Waxaa jira beelo wax kala tabanayo ama beelo laga gubay suuqyadoodii ama guryahoodii maxad ku xaliseen arrintaas?

Col. Baalle: Beelaha ay dhex martay xoola kala qaadasho ama guri gubis waxan u sameynay guddi ka kooban odayaasha dhaqanka ee dadka ay wax ka dhexeeyeen dhex dhaxadiya, waana la wadaa hawshaas.

Kaas waxuu ahaa  Col. Baalle Ibraahim Cabdi oo ah Guddoomiye ku xigeenka ururka SNF/SSRC oo aan wareysiga kaga qadnay xafiiska allgedo ee degmada Beledxaawo.  



Cabdullaahi Cali Kaalmooy
Allgedo - Beledxaawo
cabdul33@hotmail.com

 

allgedo@allgedo.com