Laamiinta iyo Baqara way, kaa layiigsamine

Lahjad xumidu weligeedba way, kugu liqdaarraane

Leexleexa iyo beenta iyo, diintu waa labo’e

Likaacooyinkaa Xamar ka yimi, ma laha liibaane

Laayaanka soo baxay runtay, labadib leeyeene

Ummaddoo ladnaanaysah bay, leexo kiciyeene

Laarrigakan diday waa ciyaal, looma taliyaahe

Waa leeddofuul aan bulshada, luun ka rogahayne

Liisha maanso maahmaahdu wow, laafo bixisaaye

Lixaad bay u yeeshaa haddii, lagu lammaanshaaye

Waxaan soo ligligayaa mid aan, lacagi goynayne

Libdho soo baxdaa lagu qashaa, lihi xalaaleede

Loogashada habeenkoo baray, tuugo legeddaaye

Leg xaaraan ah bay meel mugdi ah, laqanyo daacdaaye

Laamiga ma maro ruux hadduu, duul ku lowfaraye

Intuu luuq istaaguu afkiyo, luqunta duubtaaye

Dhagartiyo luggooyadu maryey, kugu lucuumaane

Lasow kuma barxana diintayada, libin ilaahaye

Lafdigii jihaadkay xumaan, ugu lug qaadeene

Rag tawxiid laqimayaa sidii, liigga loo qalaye

Lullumada sideeday mugdiga, libirsanaadaane

Markuu layrku damey waa kuwii, laayey dhaawaca’e

Laye waxay ku fooldhaqanayaan, licigga dhiiga ahe

Niman labokelyood ahi maxbuus, qori ma leefshaane

Markii ciidan loo loollamay, liil u diriraane

Liidnimo Bu’aalay faleen, lixuhu ooyeene

Laabta waxay ku haystaan ajnebi, labowajiile ahe

Dalkiisii nin uu laaday baa, laanbadda u sida’e

Lafeheenna waxa dhuuxay waa, laaji dhiig qaba’e

Laagihii Shabeelliyo Jubbay, carab lahaysiine

Dhulkeennii la laayacay rag kale, lamadegaan moodye

Eriteriga laafyaha xun baa, beerihii limane

Lubbi ma laha jaajuus hadduu, leefin doon yahaye

Laaluush shisheeyuhu baxshaa, luray dadkeenniiye

Nimankaa lulmaysani qolay, loxox ka qaataane

Leelada dadkii siiyey baa, lumiyey duulkaane

Niman baa lisahayoo u dhaqa, sida lo’doodiiye

Luqmadday cuneen waxay la gelin, loxod ciriiryoone

Waa lool cid kale leedohoo, niman lammeeyaane

Luqluq bay ku iibsanahayaan, ciidda luulka ahe

Laandayro baas baa sitoo, way lalmanayaane

Lugtool bay tafahayaan sidii, labo jir daayeere

Waxay laamalooyo u koreen, laalac foolxumo’e

Lajnaddaan wareersani dad bay, licib ku dheeleene

Libaaxay bulshadu dooratey, qarax u laalaane

Bumbo loolible u dhiib risheer, Liibiyaan ahiye

Intay niman Lubnaan ahi direen, laaye madaxdiiye

Leggay kaga dhufteen Deerowgii, luqadda toosnaaye

Madfac lalahayaa Yuusuf Yey, loo laxaamadaye

Labo jeerna ina Geeddi bay, lebi u fuuleene

Lixdameeye jeer bay rag kale, libiq ka siiyeene

Teer iyo Libooyay dadkii, ledid u diideene

Lohlohda iyo orodkoodu waa, laqanyo joogto ahe

Layliga waxay ugu jiraan, le’ashadeenniiye

Nin kastoo lafdhabar qaran ah baa, loox ku daabacane

Lanbarray ku soo qorahayaan, liiska geerida’e

Laqdabada intii diiddan bay, lahan ka qaadaane

Dhiigay sidii liinta iyo, leben u quutaane

Sida lowska shacabkay rabaan, inay u laystaane

Lisin iyo billaawey sitaan, luudi dhagareede

Lakabbeeye miinada siday, lun ugu aaseene

Ludda aadnigay sida biyaha, uga ladaabtaane

Laabjeexe dumarkii markay, laxawga saareene

Laacii udgoonaa ma jiro, laydha galabeede

Lebbiskii hufnaa waxa beddeley, luufaf dacal dheere

Labeeb talada weligiisba wuu, luqun jibbaaraaye

Ma liiqliiqdo ruuxii dadnimo, lexejeclaystaaye

Lafti hadday yihiin gobannimay, lulan lahaayeene

Laqwi weeye axad qaawan oo, lig isi siiyaaye

Waa laacdan doqoneed hadday, labakac leeyeene

Lusha waxay ku gubayaan dhiskoo, labaderyaale ahe

Lingaxay ka qaadeen suntay, liqi lahaayeene

Luflufkay cuneen waxa ku xiga, lulugyo naareede

Lafta dhereran iyo waxay ka jabin, liiqa bawdada’e

Liishaanku wuu qaban hadday, loxoskii diideene

Xumahay u soo lahanayaan, laasim way heline

Laleemooyinkoodaa ku mudin, leebkii geerida’e

Legdankiyo siyaasada run baa, lagu labeenshaaye

Ninkii kugu liddi ah maalin baa, laga lib qaataaye

Lillaahi iyo daacadi ka dheer, leyl midkii guda’e

Leelleelka ceebeed markaad, hore u luufluuftay

Leegleegsi dirireed haddaan, lamahuraan joogo

Gunti laguma laalaabi karo, xagaladii Liife

Lihiinteenna qarannimo intaan, shidayey luubaanta

Laalka iyo oogada intaan, laanta sare joogey

Looyaan colaadeed adaa, labay adduunkiiye

Liglig baa ku mudin meel kastood, lawga gelisaaye

Lali maysid weligaa haddaad, labagallaysaaye

Looxmaxfuud wuxuu qorin inaad, laamadood noqone

Waxaad loolinaysaba rag baa, loodin oo jebine

Luuqdayda keliyaa jarjarin, locobbadaadiiye

Haddaad labolegdaysana sidaan, laacayaad noqone

Lafoguridda hadalkaagu waa, lohod itaalkiise

Laqbayntaada xumi derisyaday, kugu likaysaaye

Markaad igu lartaba anigu waan, labojibbaamaaye

Laxdii kawkabtaa waa in ay, labac ahaataaye

Sidii laahi falan been intaad, labocanlaynaysid