Taliyaha ciidamada Booliska oo 24 loo qabtay in uu kaga baxo magaalada Baydhabo

Mogadishu- October 16, 2006 Taliyaha ciidamada Booliska dowladda KMG ah ee Somalia Gen. Cali Madoobe oo ka soo jeeda gobolka Gedo ayaa 24 saac muddo ah lagu siiyay in uu kaga baxo magaalada Baydhabo, ka dib markii jananka lagu eedeeyay in uu ka dambeeyay shaqaaqadii dadka ay ku geeriyoodeen oo ka dhacday garoonka diyaaradaha Baydhabo horaantii bishii hore.

Hadalkaan ayaa waxaa magaalada Baydhabo ka sheegay Aadan Saransoor oo ah taliye Kooxeed saameyn ku leh magaalada Baydhabo.

Saransoor waxa uu sheegay in 24 saac ay ka codsadeen ra’isulwasaaraha iyo xubnaha digil iyo mirifle in la siiyo Gen. Cali Madoobe si uu uga huleelo magaalada Baydhabo, ka dib kulan balaaran oo maanta ka dhacay magaalada Baydhabo oo uu ka soo qeybgalay Ra’isulwasaaraha.

Jananka oo shalay soo gaaray magaalada Baydhabo ayaa isla xalay waxaa xiisadi ay ka buurtay imaatinkiisa gudaha magaalada, iyadoo maleeshiyooyin boqolaal gaaraya ay isku gadaameen guri uu daganaa Jeneraal Cali Madoobe, inkastoo markii dambe la kala qaaday labada ciidan.

24 ka saac ee loo qabtay Gen. Cali madoobe in uu kaga baxo magaalada Baydhabo ayaa waxa ay ku soo beegmatay xilli ay soo baxayaan warar sheegaya in Jananka booskiisa lagu badali rabo Col. Cabdi qeybdiid oo ka mid ahaa Isbaheysigii laga eryay caasimadda Somalia .

Xafiiska Muqdisho

Allgedo News Media Network (ANMN)
allgedo@allgedo.com