Maxkamadaha oo Bandow ku soo rogay Xarardheere, ka dib markii dibadbaxyo rabshado wata ay ka dhaceen halkaasi

Mogadishu- October 17, 2006 Dibadbaxyo balaaran ayaa maanta ka dhacay magaalada xarardheere oo looga soo horjeeday sida la sheegay canshuuro xad dhaaf ah oo Maxkamadaha islaamka ay ku rogeen magaaladaasi, iyadoo dhinaca kale caawa uu bandow saaran yahay halkaasi.

Boqolaal dad ah ayaa maanta isugu soo baxay gudaha magaalada Xarardheere, kuwaasi oo ku dhawaaqayay halku dhigyo ka dhan ah Maxkamadaha islaamka, oo ku aadan lacago cashuuro ah oo maanta halkaasi ay ku soo rogeen Maxkamadaha.

Dibadbaxaan ayaa markii uu socday qadaro yar waxa uu isku badalay rabshado, iyadoo ciidamada Maxkamadaha islaamka ay kala eryeen dibadbaxayaashii.

Ilaa 7 ka mid ah ganacsatada magaalada Xarardheere oo uu ku jiro ganacsade Max’ed Cabdulle Tuuryare ayaa xabsiga la dhigay, iyadoo caawana magaaladaasi lagu soo rogay Bandow bilaabanaya 9ka habeenimo.

Maxkamadaha islaamka Somalia ayaa horaantii bishii August gacanta ku dhigey degmada xarardheere, iyadoo wax dagaal ah aanu halkaasi ak dicing, iyadoo degmadaasi xeebaheeda ay saldhiyo u ahaan jirtay kooxaha burcad badeedyada.

Xafiiska Muqdisho

Allgedo News Media Network (ANMN)
allgedo@allgedo.com