Dadka qaar oo ka qaxaya Bu’aale iyo Hay’adaha samafalka oo isaga baxay halkaasi

Mogadishu- October 18, 2006 Hay’adihii samafalka ayaa gabi ahaan isaga baxay magaalada Bu’aale oo ay isku fara saari rabaan xoogga Maxaakiimta islaamka iyo kuwa Col. Barre Hiiraale oo kaabiga ku soo haya magaaladaasi, ka dib markii shalay ay ka soo ruuqaansadeen degmada Saakoow. Iyadoo sidoo kale magaalada ay ka qaxeen boqolaal qoys.

Ilo wareed ku sugan magaalada Bu’aale ayaa allgedo.com u sheegay in magaaladaasi laga dareemayo xiisado dagaal oo ba’an, iyadoo ciidamada maxkamadaha ee jooga halkaasi la galiyay heegankii ugu sareeyay.

Ka bixitaanka hay’adaha samafalka ee magaalada Bu’aale ayaa waxa ay timid ka dib markii magaalada Bu’aale ay ku soo dhawaadeen maleeshiyooyinkii Col. Barre Hiiraale, iyadoo laga cabsi qabo dagaalo lagu hoobto oo dhex mara labada dhinac.

Boqolaal qoysas ah oo ilmo gacanta ku sita ayaa lagu arkayay deegaano ku dhow dhow magaalada Bu’aale kuwaasi oo ku jiheysan magaalooyin kale oo nabdoon.

Si kastaba ha ahaatee gobolada Jubbooyinka ee K/Somalia ayaa waxa ay la ciirayaan colaado iyo dagaalo sokeey, iyadoo haddii dagaal uu ka dhaco halkaasi uu ka dhalan karo qasaarihii nafeed ee ugu ba’anaa 16 kii sano ee la soo dhaafay.

Dhinacyada isku horfadhiya magaalada Bu’aale ayaa waxa ay ku loolamayaan gacan ku heynta magaalada xeebta ah ee Kismaayo oo maxkamadaha islaamka ay qabsadeen 25 kii bishii la soo dhaafay, iyadoo aanu dhicin wax rasaas ah, ka dib markii si nabdoon halkaasi uu isaga Baxay Col. Barre Hiiraale iyo ciidamadiisii.

Xafiiska Muqdisho

Allgedo News Media Network (ANMN)
allgedo@allgedo.com