Dhimasho iyo dhaawaca badan oo ka dhashay iska horimaad ka dhacay duleedka Kismaayo

Mogadishu- October 19, 2006 Dhimasho iyo dhaawacyo halis ah ayaa ka dhashay ka dib markii kooxo maleeshiyo ah ay rasaas ooda kaga qaaday gaari ay leedahay Shirkadda Dahabshiil inta u dhaxeysa Janaay cabdalle iyo Buulo Gaduud ee duleedka magaalada Kismaayo, iyadoo kooxahaasi ay doonayeen in ay dhacaan gaariga.

Kooxo maleeshiyo ah oo la tilmaamay in ay ka mid yihiin kuwa Barre Hiiraale ugu xareysan deegaanka Beer-xaano ayaa weerar gaadmo ah ku soo qaaday gaari ay leedahay shirkadda Dahabshiil, iyadoo rasaas ay la beegsadeen ay ku geeriyoodeen 2 ruux halka 5 kale oo uu ka mid yahay madaxa laanta Dahabshiil Kismaayo Bashiir Cabdi Aadan uu dhaawac ka soo gaaray.

Dadka dhintey iyo kuwa dhaawacmay ayaa waxaa wadada ka soo qaaday gaari xamuul ah oo sida la sheegay ka yimid dhinaca degmada Ceelwaaq, ka dib markii ay kooxihii burcadda ahaa ay carareen, inakstoo aan la soo sheegin wax ay horey u sii dhaceen.

Gaarigaan ay leedahay shirkadda Dahabshiil ayaa waxaa la tilmaamay in saakay uu ka ambabxaay magaalada Kismaayo, isagoo lacago u sida laanta shirkadda ay ku leedahay magaalada Afmadow, iyadoo markii uu soo laabtay gaariga isagoo marayay inta u dhaxeysa Buulo gaduud iyo Janaay cabdalle ay kooxo hubeysan tacshiirado la beegsadeen.

Meydka iyo dhaawaca ayaa waxaa la keenay magaalada Kismaayo, iyadoo isla galabta sida la tilmaamayo la aasay meydkii halka kuwii dhaawaca ahaana lagu dabiibayo isbitalka magaalada Kismaayo.

Kooxihii falkani geeystay ayaa waxaa la tilmaamay in ay u baxsadeen dhinaca deegaanka Beerxaanpo oo la sheegay in halkaasi ay joogaan maleeshiyooyin daacad u ah Barre Hiiraale.

Xafiiska Muqdisho

Allgedo News Media Network (ANMN)
allgedo@allgedo.com