Xukuumadda FKMG Somalia oo shuruudo ku xirtey ka qeybgalka kulanka magaalada Khartoum

Mogadishu- October 20, 2006 Dowladda KMG ah ee Somalia ayaa shuruud adag ku xirtey ka qeybgalka kulanka magaalada Khartoum, xilli maalmo ay ka harsan tahay 30 ka bisha October oo wafuud dowladda iyo Maxkamadaha ka socda ay ku kulmataan dalka Suudaan.

Dowladda KMg ah ee Somalia ayaa waxa ay sheegtay in marnaba aanu la fariisan doonin Maxaakiimta islaamka Somalia inta ay ku jiraan gobalada Jubooyinka.

Wasiirka arimaha dibadda Somalia Ismaciil Hurre Buubaa ayaa hadalkani u sheegay suxufiyiinta magaalada Nairobi, isagoo tilmaamay in marnaba aanu wafuud ka socota dowladda aysan ka qeybgali doonin wada hadalada Khartoum, inta Maxkamadaha islaamka ay dib kaga laabanayaan gobolada jubooyinka.

“ Waa macquul in aanu tagno shirka Khartoum hadii Maxkamadaha islaamka ay dib ugu laabtaan magaalada Muqdisho, laakiin inta ay joogaan ma jiro wax wada hadal ah” ayuu yiri Buubaa.

Ismaciil Hurre Buubaa ayaa ku eedeeyay Maxkamadaha islaamka in ay wadaa qorshayaal ay dhul balaarsi ku sameynayaan.

Arintaan ayaa ku soo beegmatay xilli la hadal hayo cabsi dagaal ka dhaca Jubooyinka oo dhex mara Maxkamadaha islaamka iyo xoogagga Barre Hiiraale oo gadaal ay ka soo riixayaan dowladaha Ethiopia iyo Somalia.

Xafiiska Muqdisho

Allgedo News Media Network (ANMN)
allgedo@allgedo.com