Madaxweynaha Somalia iyo wafuudii Maxkamadaha oo ka kala dagay Baydhabo iyo Muqdisho.

Mogadishu- October 20, 2006 Madaxweynaha dowladda KMG ah ee Somalia ayaa gaaray galabta magaalada Baydhabo, ka dib markii uu ka soo qeybgalay kulankii shalay kooxda xiriirka caalamiga ay ku yeesheen magaalada Nairobi, iyo war kale oo ku aadan wafuudii Maxkamadaha islaamka ee iyana ka qeybgashay kulankaasi oo soo gaaray magaalada Muqdisho.

Madaxweynaha Somalia C/laahi Yuusuf Axmed iyo xubno la socda ayaa dib ugu soo laabtay magaalada Baydhabo, iyadoo si weyn halkaasi loogu soo dhaweeyay,.inkastoo Madaxweynaha aanu suxufiyiinta war ka siinin socdaalkiisa.

Madaxweynaha Somalia ayaa ka soo qeybgalay kulanka kooxda xiriirka Somalia, iyadoo halkaasi uu ka aqriyay warqad qoraal ah oo ka dhan ah Maxkamadaha islaamka.

Madaxweynaha Somalia ayaa maalmo ku sugnaa dalka Ethiipia ka hor shalay inta aanu soo gaarin magaalada Nairobi, iyadoo Adis ababa uu kula kulmay Ra’isulwasaaraha dalkaasi Males Zeanwi oo ay ka wada hadleen arimaha ciidamo keenista Somalia.

Dhinaca kale wafuudii Maxaakimta islaamka oo uu hogaaminayay ninka Maxkamadaha ugu qeybsan amuuraha dibadda Prof. Ibraahim caddoow ayaa dib ugu soo laabtay galabta magaalada Muqdisho, iyadoo halkaasi ay si weyn ugu soo dhaweeyeen madaxda maxaakiimta islaamka.

Xafiiska Muqdisho

Allgedo News Media Network (ANMN)
allgedo@allgedo.com