Booliska Puntland oo ku raadjooga nin u dhashay dalka Thailand oo xalay lagu afduubtay Boosaaso

Mogadishu- October 21, 2006 Ciidamada booliska Maamul goboleedka Puntland ayaa ku raadjooga wali kooxo dabley ah oo xalay afduub ugu geeystay gudaha magaalada Boosaaso nin u dhashay dalka Thailand oo u shaqeynayay shirkad ilaalisa xeebaha Puntland.

Ninkani ayaa waxaa la tilmaamay in xalay fiidkii Hotel uu ka daganaa magaalada Boosaaso ay kala baxeen rag hubeysan oo ilaa iyo wali aan la garaneyn heybtooda iyo halkii ay la aadeen.

Ninkani la afduubtay ayaa waxaa la sheegay in uu u shaqeynayay shirkad ilaalisa xeebaha Puntland oo maamulka gobolkaasi ka hore ay heshiis wada saxiixdeen.

Waa markii ugu horeysay oo afduubyo ceenkaan oo kale ah ay ka dhacaan magaalada Bosaaso.

Xafiiska Muqdisho

Allgedo News Media Network (ANMN)
allgedo@allgedo.com