Xiisado dagaal oo aad u ba’an oo ka taagan Magaalada Buur-hakaba iyo meelo kale

Mogadishu- October 22, 2006 Waxaa wali sii xoogeysanaya xiisadaha dagaal ee ka jira xuduudaha ay wadaagaan gobolada Baay iyo Bakool, ka dib markii ciidamo fara badan oo gurmad ay soo gaareen deegaanada Qardho iyo Buur-hakaba oo ay isku horfadhiyaan ciidamada dowladda iyo kuwa maxaakiimta islaamka.

Gawaari dagaal oo fara badan iyo ciidamo lagu soo daabulay gawaarida xamuulka ayaa xalay lagu soo daadgureeyay degmada Buur-hakaba si ay u xoojiyaan ciidamada dowladda KMG ah ee Somalia ee shalay la wareegay gacan ku heynta magaalada Buur-hakaba.

Sidoo kale ciidamo iyo gawaari dagaal oo ka tirsan maxaakiimta islaamka ayaa iyaguna gaaray deegaanka Qardho oo 15 KM u jira magaalada Buur-hakaba, halkaasi oo ay horey ugu sugnayeen maleeshiyooyin shalay laga soo eryay magaalada Buur-hakaba oo taageersan maxkamadaha islaamka.

Dhaq dhaqaaqyada ciidan oo ay ku howlan yihiin dowladda KMG ah iyo Maxkamadaha islaamka Somalia ayaa u muuqdo kuwo sii xoogeysanaya marba marka ka dambeysa, iyadoo laga cabsi qabo in maanta iska horimaad uu dhaco; hadii dagaal uu bilowdana ay K/Somalia jilbaha dhigeyso colaado sokeeye.

Shalay ayay aheyd markii ciidamo ka tirsan dowladda kMG ah ay gacanta ku dhigeen degmada Buur-hakaba oo dowladu ay sheegtay in ay ka eryeen maleeshiyooyin qalqal ku ahaa amaanka xarunta dowladda KMG ah.

Xafiiska Muqdisho

Allgedo News Media Network (ANMN)
allgedo@allgedo.com