Mogadisho/Somalia - Ciidamada dowladda Itoobiya oo wata Taangiyo ayaa markii ugu horeysay soo galay caasimadda Soomaaliya, iyagoo ka so galay dhanka Ex- Control Balcad ee Suuqa Xoolaha ee duleedka caasimadda, kuwaasi oo gudaha u soo galay Muqdisho.

Ciidamadan ayaa waxaa wehliya kuwa dowladda KMG ah ee Soomaaliya, kuwaasi oo iyana sidoo kale ay isku mar soo galeen caasimadda Muqdisho isla markaana fariisimano ka sameysteen xeryaha ay deganaan jireen cidamadii la jebiyay ee Maxkamadaha.

Inta laga warqabo taariikhda, waa markii ugu horeysay oo ay Ciidamo Ethiopian ah soo galaan caasimadda Soomaaliya, iyadoo Somalia iyo Ethiopia ay waligeedba ka dhaxeysay cadowtinimo soo jireen ah.

Ra’isulwasaaraha Dalka Ethipoia Meles Zenawi ayaa maanta mar uu shacabka dalkiisa kala hadlayay aaladaha war tebinta sida Raadiyaha iyo TV-ga waxuu yiri "maanta ciidamadeena gudaha ayay u galeen caasimadda Soomaaliya ee Muqdisho, waana ay jabsheen kooxihii mayalka adkaa ee maxkamadaha", isagoo hadalkiisa sii watana waxuu sheegay Zanawi in uu wacad ku maray in aanu ka hari doonin kooxaha shabaabka ah, isla markaana uu kaga daba tegi doono kulana dagaalami doono dhinaca Gobolada ay u baxsadeen ee Jubbooyinka.

Arintaan ayaa waxa ay ku soo beegmatay xilli Maxkamadaha Islaamka Somalia ay maalintii shalay aheyd faaruqiyeen Caasimadda Soomaaliya, iyagoo u jiheystay dhinaca Jubboyinka.

Allgedo News Media Network
Xafiiska Muqdisho
allgedo@allgedo.com