Advertisement

Ujeedada shirkan waxay aheyd sidii dhaqaale loogu uruurin lahaa mushruuc waxbarasho, oo isugu jira waxbarashada assaasiga ah iyo mida sare, lagana hirgelin doono goboladda Gedo iyo Galgaduud hadduu Alle Idmo. Waxaa shirkan ka soo qayb galay dad aad u badan oo isugu jira ganacsato, aqoon yahanno, ardayda wax ka barta jaamacadaha Columbus iyo dadweynaha ku dhaqan magaaladaas.

Waxaa shirka furay Guddoomiyaha ururka SDF Professor Warsame Ali oo halkas ka soo jeediyay qudbad isugu jirtay soo dhaweyn, mahadcelin iyo waxqabadka iyo himilooyinka ururka SDF. Professor Warsame hadaladiisa waxaa ka mid ahaa “ama bax ama bixi, oo micnaheedu yahay ama dalkii ku noqo oo ka qayb qaado dhismihiisa ama bixi kaalmo lacageed oo dalkii lagu dhiso”. Prof. Warsame waxaa uu sheegay in aqoontu tahay furaha hurumarka aadanaha, koritaanka iyo joogteynta dhaqaalaha iyo bidhaaminta mustaqbal nuur leh iyo yadadiilo gelinta dadka. Waxaa iyana halkaasi haddalo soo dhaweyn iyo gubaabo ah kasoo jeediyay Guddoomiyaha Somali Community of Culombus Mr. Hassan Ali Omar iyo Mohaned Ugaas Hirsi oo ka hadlayay magaca reer Columbus oo iyagu marti loo ahaa. Waxaa sidaas oo kale maxaadaro diini ah oo aad loo jecleystay ka soo jeediyay Sheekh Mohamed Diini.

Waxaa kale oo shirkaasi ka hadlay Dr. Cabdulqadir A. Maxamuud “Jangeli”. Oo ka mid ah key note speakers. Dr. Cabdulqadir wuxuu si gaar ah ugu dheeraaday doorka ay waxbarashadu ka qaadan karto xalka dhibaatooyinka Soomaaliya ka jira isaga oo sheegay in mushkuladaha Soomaaliya ka jira laga bixi karo haddii ay dadka Soomaaliyeed aqoon yeeshaan. “Dhibaatooyinka faraha badan ee Soomaaliya haysta, sida dagaallada iyo gaajada, waxaa saldhig u ah aqoon darro waxbarashada” ayuu yiri Dr. Cabdulqaadir Jangeli, wuxuuna ka codsaday dadkii shirka jooggay inay si dhab ah uga qayb qaataan taageerada barnaamijka waxbarasha ee uu soo bandhigay ururka SDF. Wuxuu xusay in aqoonta sare ay tahay wadada dowladda wanaagsan iyo khilaaf bixinta murunka iyo qalalaasaha.

Waxaa halkaas PowerPoint Presentation ku saabsan mashruuca tacliinta sare iyo midda aasaasiga ah oo la qorsheyneyno in laga hergeliyo Gobolka Gedo iyo Galgaduud ka soo jeediyay Mr. Ali Malaaq Ahmed Iyo Mr. Mohamud Abdule Indhacasae. Waxay soo bandhigeen daraasad muujineysa xaqiiqda iyo baahida waxbarasho iyo midda nololeed ee ka jirta guud ahaan Somalia gaarhaaana Gobolada Gedo iyo Galgaduud. Ali iyo Mohamud waxaa kale oo ay daraasad cilmiyeedkaas ku muujieyeen waqtiga mashruucaas la qabanayo, xoogga iyo dhaqaalaha hawshaasi u baahan tahay iyaga oo xusay in farqiga u dhexeya wadamada horumaray iyo kuwa saboolka ayan aheyn qayraadka ku ku jira dhulkooda balse heerka tacliinta sare iyo technologiya. Waxay shirweynaha xasuusiyeen in aqoontu tahay hubka ugu casrisan oo lagula dagaalamo macluusha, qabyaaladda, musuqmaasuqa, cadaalad darada iyo cudurka. Waxaa kale oo ay ka hadleen doorka dadka qurboolayda ay ka qaadan karaan horumarinta dadkooda iyo dalalkooda.

Waxaa sidaas oo kale halkaas qudbad xiiso badneyd oo la sugayay ka soo jeeday Dr. Cali Khaliif Galaydh. Dr. Khaliif wuxuu dadkii shirka isugu yimid uga warbixiyey xaaladda siyaasadeed ee ay Soomaaliya hadda ku sugan tahay, wuxuuna warwar ka muujiyey dagaalada laga cabsi qabo inay ka qarxaan Soomaaliya. “arrintu hadda waxay ku jirtaa gacan Soomaaliyeed, xalkuna wuxuu ugu dhow yahay haddii Soomaalidu wada hadasho. Haddiise ciidamo Ethiopian ah la keeno, taladu gacanta Soomaalida way ka baxaysaaye oggaada” ayuu yiri Dr. Galaydh. Isagoo ka hadlaayey isbedeladii dhowaan Soomaaliya ka dhacay, gaar ahaan magaalada Muqdisho, Dr. Galaydh wuxuu sheegay in ay abuurantay rajo laga qabo in Soomaaliya nabad lagu soo dabaalo, laakiin loo baahan yahay in isbedelkaasi si degan loo maamulo. Ugu danbeyntii Dr. Khaliif wuxuu u soo jeediyey kooxaha isku haya siyaasadda Soomaaliya inay isu dulqaataan, kana fogaadaan fikirka ah in kooxi kooxda kale dagaal uga adkaato. Wuxuu Somalidu kula taliyay inay ka soo dhexbaxaan suntuuuqa yar oo ay ku dhexjiraan iyo isku habsaamida dhexdooda ah oo ay ka fekeraan aragti fog iyo mustaqbalkooda (Bigger picture). Dr Khalif wuxuu Somalida ka codsaday inay aqoonta u hiiliyaan maxaa yeelay waa furaha nabad ku wada noolanshaha, xasiloonaanta iyo xaqsoorka. Dr. Cali Khaliif Galaydh wuxuu amaan u soo jeediyey Ururka Horumarinta Soomaaliyeed, oo uu sheeegay inay hawl muhim ah ummadda u hayaan. Wuxuuna ku dhiirigelyey dhalinyaradii halkaas isugu timid inay ka qayb qaataan nabadeynta iyo dib u dhiska Soomaaliya, isla markaana ay dalkii dib ugu noqdaan

Ugu danbeyntii ganacsatadii iyo dadweynihii shirkaasi ka soo qayb galay waxay ugu yabooheen Ururka Horumarinta Soomaaliyeed (UHS) lacag gaareysa $40,000. shirkadihii iyo hay’adihii lacagta ku yaboohay waxaa ka mid ahaa: Shirkadda Dahabshiil, Global home Care, Bell Home Care, Hamarweyne Centre, Columbus global home care, Hiiraan University, Xawaaladda Tawakal iyo Global Mall.


Warbixintaan waxaa Allgedo soo gaarsiiyay Dr. Ali Malaaq Ahmed, email address: raamoraaxo@hotmail.com

 

Allgedo News Media Network
allgedo@allgedo.com