Allgedo News, Sabti,  December 9,  2006

Mudane Faarax Macalin Dawara oo booqasho gaaban ku yimid Phoenix, Arizona

By A. A. Colujoog


Si aad u aragto masawirada kale, riix (Masawiro.)
To see more pictures, click (Pictures)

 

Allgedo News - Maanta oo ay taariikhdu tahay December 9, 2006, waxaa magaalada Phoenix ee Gobolka Arizona (USA) booqasho gaaban ku yimid mudane Faarax Macalin Dawaara oo ah Gudoomiyaha Xisbiga FORD-P ee dalka Kenya. (Eeg masawirka dhanka midig ee sare mudane Faarax Macalin oo qudbad muhiim ah u jeedinaya jaaliyadda Soomaaliyeed ee reer Phoenix.)

Mudanaha oo ah siyaasi weyn oo ruug cadaa ah ayaa waxaa magaalada Phoenix si weyn ugu soo dhaweeyay qaar ka mid ah jaaliyadda Soomaaliyeed ee ku dhaqan Gobolka Arizona oo tiradoodu lagu qiyaasay ilaa iyo 10,000.  Guddoomiye Dawaara waxuu horay usoo maray shirarna uu lasoo qaatay jaaliyadaha Soomaaliyeed ee Minniapolis, Minnesota iyo San Diego, California. 

Shirka uu Guddoomiyaha la yeeshay jaaliyadda Soomaaliyeed ee ku dhaqan Phoenix iyo agagaaraheeda ayaa waxaa isku soo duba riday Ururka Soomaaliyeed ee Somali Association of Arizona.
(Eeg masawirka dhanka midig ee hoose, Guddoomiyaha Somali Association of Arizona Dr. Cabdixakim oo munaasabadda shirka furaya.) 

Furitaankii shirka ayaa waxaa lagu bilaabay aayado quraan ah, dabadeedna waxaa la guda galay barnaamijyadii loogu tala galay in uu shirka ku socdo ayada oo ay halkaasna ka hadleen dad fara badan oo ay ka mid ahaayeen: Dr. C/xakim Axmed C. Cisman (Guddoomiyaha Somali Association of Arizona), Ambassador - General Maxamed Darman), Ex-Col. Axmed Jaamac (Dhagaweyne), Dr. Maxamed Jamac, Sheikh Cabdikhaliq (Shiikha magaalada Phoenix) iyo ugu danbeyntii mudane Farax Macalin Dawara.

Jaaliyadda Soomaaliyeed ee Phoenix ayaa maalintaas waxaa laga dareemi karay wajiyadooda farxad iyo jaceyl ay u qabeen in ay si diiran ugu soo dhaweeyaan walaalkooda Soomaaliyeed ee ka yimid Geeska Afrika iyagoo haddana jeclaa in ay dhageystaan qudbadda dhaxalgalka ah ee uu halkaas kasoo jeedin doono mudane Faarax Macalin Dawara.

Furitaankii aayadaha quraanka kaddib, waxaa halkaas gabay qiima badan oo aad loo jecleystay ka tiriyay abwaan Cabdiraxmaan Suni, dabadeedna waxaa cod baahiyaha loo dhiibay mudane Farax Macalin oo halkaas kasoo jeediyay qudbad uu si qoto dheer ugu qaadaa dhigay arrimaha siyaasadda iyo taariikhda geeska Afrika.

Mudane Faarax mar uu ka hadlayay arrimaha dhinaca siyaasadda ayaa waxuu yiri "Soomaaliya waxaa markii horeba bur-buriyay shisheeye, inta ay umadda Soomaaliyeed taas ka fahmeyso oo ay iyada isku tashaneysana waligeed deganaasho iyo horumar toona gaari meyso."  Sidoo kale waxuu mudanaha si toos ah carabka ugu adkeeyay in IGAD, ITOOBIYA IYO KENYA TOONA aanay dooneyn in ay marnaba Soomaaliya deganaasho ka dhacdo, maxaa yeelay buu yiri intuba dano gaar ah ayay Soomaaliya ka leeyihiin, sidaas awgeed, waxaan ku talinayaa buu yiri in haddii Soomaaliya nabad laga rabo ay haboon tahay in ay Soomaalida dhexdooda ka heshiiyaan caalamkana uu sidaas ku taageero.

Mar ay allgedo wax ka weydiisay sida uu u arko in uu xalku yahay is mari waaga siyaasadeed ee Dowladda Federaalka Soomaaliyeed iyo Golaha Maxaakiimta waxuu ku jawaabay "xalku waa in ay labadaas garab isu yimaadaan oo ay iyaga dhexdooda ka heshiiyaan, isla markaana dowlad ay ku mideysan yihiin dhistaan", xal ka aniga sidaas baan u arkaa ayuu hadalkiisii raaciyay mudane Faarax.

Mudane Faarax Dawaara oo aad wejigiisa ka dareemi kartay in uu aad iyo aad uga xun yahay nasiib darada Soomaalida ku habsatay iyo sida aanay intooda badanba arrintaas ugu baraarugsaneyn ayaa waxaa hadaladiisii ka mid ahaa "Soomaaliya anaa bur-buriyay ee ma ahan cidda bur-burisay adinka!", sababtuna waxay tahay buu yiri "markii labada Gobol ee Waqooyi iyo Koofur ay xornimadii ka qaateen Ingiriiska iyo Talyaaniga sanadkii 1960-kii, maalma yar gudahoodna waxay ku dhawaaqeen buu yiri wax la yiraahdo Somali weyn "GREATER SOMALIA" iyo in Gobolada maqan oo ah NFD, SOMALI GALBEED IYO JABUUTI loo howl galo sidii loo xoreyn lahaa xoog iyo xeelad tii ay doontaba haloo adeegsadee.  Arrintaasi waxay aheyd buu yiri qalad, maxaa yeelay, dhamaan dowladihii gumeysiga ee xornimada laga qaatay iyo kuwa Soomaaliya deriska la ah sida: Itoobiya iyo Kenya midna raali kama aheyn in marnaba ay rumowdo riyada Soomaaliyeed ee ah SOMALI WEYN iyo in ay shanta Soomaaliyeed midoobaan toona.  Sidaas awgeed, anigu waxaan u arkaa buu yiri in bur-burka maanta ku dhacay Soomaaliya ay sababtay doonitaankii shanta Soomaaliyeed ayada oo aanay jirin awood dhaqaale iyo mid siyaasadeed ee lagu soo xaro gelin karo gobolada maqan ee ay Soomaaliya sheeganeyso.

Qudbad dheer oo dhaxal gal ah kaddib, waxuu hadalkiisii kusoo gebo-gebeeyay mudane Dawaara muhiimadda ay leedahay in Soomaalida meel ay joogtaba laga rabo in ay isku tashtaan, soona celiyaan sharaftii iyo karaamadii Soomaaliyeed, isla markaana ay iska daayaan isku haleynta iyo ku tiirsanaanta dowlado ama dad aanan marnaba ka shaqeyneyn danta iyo maslaxadda umadda Soomaaliyeed.


Wareysiga ay allgedo la yeelatay mudane Faarax Macalin Dawaara riix (wareysi)


allgedo@allgedo.com





 

                            Allgedo  Online © 2006 - All Rights Reserved.                        
 Contact us at: allgedo@allgedo.com