Allgedo News, Sabti,  October 28,  2006

Shir dhinaca Teleefanka ah (Teleconference) oo dhexmaray qaar ka mid ah qurbajooga beesha Sade (USA) iyo Sheikh Maxamed Weli oo isagu ku sugan magaalada Kismaayo

(Allgedo News) - Maanta oo ah Sabti, October 28, 2006, ayaa waxaa dhacay shir teleefaneed (Teleconference) dhex maray qaar ka mid ah qurbajooga beesha Sade ee ku nool USA iyo Sheikh Maxamed Weli oo isagu laga soo xariiriyay magaalada Kismaayo.  Shirkaan oo bilowday 12:00 PM (EST)  ama 9:00 AM (PST) waqtiga USA ayaa dhamaaday saddex saacadood kaddib.

Ugu horeyntii, shiikha waxuu warbixin dheer ka bixiyay dagaalkii ay golaha midowga Maxaakiimta la galeen kagana adkaadeen hogaamiye kooxeedyadii gobolada Koofureed, isagoo dadkii qadka teleefanka ku jiray ku baraarujiyay muhiimadda ay leedahay ka qeyb qaadashada maamulka golaha Maxaakiimta.

Halkan waxaan idinkugu soo gudbineynaa qaar ka mid ah su'aalo dhowr ahaa oo geba-gebadii shirka shiikha la weydiiyay iyo jawaabihii uu ka bixiyay:

Su'aal:  Sheikh Maxamed Weli, ma jiraan dad aan Soomaali aheyn (ajnabi) oo wax ka haya maamulka Jubbooyinka, gaar ahaan kan magaalada Kismaayo?

Jawaab: Horta waxaan idiin sheegayaa in dhamaan jagooyinka gudoomiyaha Gobolka Jubbada Hoose, kan duqa magaalada, kan dekedda iyo kan Gegida diyaaradahaba ay maamulkaan dad Soomaali ah,  hase ahaatee waxaan rabaa in aan halkaan idinkugu sheego in aad ogaataan xataa haddii ay dad kale oo aan u dhalan Soomaali dalka joogaan, marba haddii ay muslim yihiin in aan la oran karin waa ajnabi.

Su'aal: Dowladda Itoobiya waxay dalka Soomaaliyeed soo gelisay ciidamo xoogan oo aad u fara badan, adinka haddii aad tihiin golaha midowga Maxaakiimta, maxaa diyaar garow ah ee aad arrintaas ka sameyseen, rajadiina ah in aad ciidamada Itoobiya dalka Soomaaliya ka saartaana intee la'eg tahay?

Jawaab: Horta sida aad ka warqabtaan dagaalkii dhex maray Soomaaliya iyo Itoobiya sanadkii 1960, tirada ciidamada Soomaaliya ee xiligaas waxay aheyd 9000 oo askari, halka ay kuwa Itoobiyana ahaayeen 100,000 oo askari, dagaalkaasna waxay guushu ku raacday Soomaaliya.  Marka waxaan oran karaa hadda waan u diyaar garownay sidii aan ula diriri laheyn dowladda Itoobiya oo aan dalka yaga uga saari laheyn, waxaana ku kalsoonahay maanta oo aan dhan kasta kaga xoog badanahay cududii ciidan ee aan laheyn sanadkii 1960-kii, idam Ilaahna waan ka adkaan doonaa Itoobiya haddii ay nagula dagaalamaan gudaha dhulkayaga.

Su'aal:  Sheikh Maxamed, adiga kaalinteed kaga jirtaa golaha Maxaakiimta?  Haddiise ay beesha aad ka dhalatay ay u baahato in ay la xariirto maamulka sare ee Maxaakiimta ma aday kuu soo mareysaa, mise waxay toos ula xariirayaan gudoomiyaha guddiga Shuurada Sheikh Shariif Sh. Axmed?

Jawaab:  Horta aniga labada gole ee midowga Maxaakiimta midna kuma jiro, laakiin waxaan ahay xubin fir-fircoon oo Maxaakiimta ka tirsan warkiisana la qadariyo, isla markaasna wakiil ka noqon kara beesha uu kasoo jeedo, sidaas awgeed haddii ay beesha aan ka dhashay rabto in ay la xariirto maamulka sare ee Maxkamadaha way ii sheegan karaan waxa ay baahidooda tahay, anigana waxaan ula noqonayaa hogaanka sare ee Maxaakiimta, sida aan ku kal soonahayna arrimahaas ku saabsan xiriirinta dadweynaha iyo maamulka Maxaakiimta oo muhiimad weyn leh door weyn ayaan kasoo qaatay iminkana kaga jiraa waana sii wadi doonaa intii karaankey ah.

Maxamed Weli waxuu dadkii qadka Teleefanka ku jiray u xaqiijiyay in dadaal badan oo dhex-dhexaadin ah kaddib ay ku guuleysteen in maleeshiyadii Beer-xaano ee uu hogaaminayay Col. Cabaas ay ku soo biireen midowga Maxaakiimta kuwaasoo hadda ku sugan gudaha magaalada Kismaayo.

Ugu danbeyntii, Shiikha waxuu ku cel-celiyay muhiimadda ay leedahay in umadda Soomaaliyeed meel ay joogtaba ay si buuxda isu garab taagaan midowga Maxaakiimta, isagoo isla markaana meesha ka saaray warar sheegayay in ay jiraan qaldaad iyo mugdi-mugdi la xariiray qaabkii Col. Bare Aden Shire (Bare Hiiraale) ay Maxkamaduhu xukunka Jubooyinka uga fara maroojiyeen.





Allgedo News Media Network (ANMN)
allgedo@allgedo.com