Col. Bare Aden Shire (Hiiraale) iyo meleeshiyadii taabacsaneyd oo xalay saqdii dhexe baneeyay rugihii ay ku lahaayeen Degmada Baardheere oo laga yaabo in ay ku biiraan xoogagga midowga Maxaakiimta!

Waasiirka Gaashaan dhigga Dowladda FKMG ah, Col. Barre Aden Shire iyo maleeshiyadii taabacsaneyd ee ay kal dhaweyd Midowga Maxaakiimta ka qabsadeen Gobolada Jubooyinka ayaa xalay saqdii dhexe si lama filaan ah u baneeyay rugihii ay ku lahaayeen Degmada Baardheere.  Wasiirka oo sida la wada og yahay aanan waligii jecleyn in ay ciidamada IGAD cag soo dhigaan ciida Soomaaliyeed, gaar ahaan kuwa Dalka Itoobiya; isla markaana ay waayadaan danbe soo food saartay deganaasho la'aan dhinaca siyaasadda ah ayay guuritaankiisa ku soo beegan tahay kaddib markii ay: Dowladda Itoobiya Addis ugu yeertay Col. Cabdulahi Yuusuf arrimo la xariira wada tashi iyo sidii dalka Soomaaliyeed loo qaban lahaa, dalka Soomaaliyeed oo ay xiligaan soo food saartay qatar balaaran oo kaga soo fool leh duulaano balaaran oo la damacsan yahay in ay meelo badan uga soo qaadaan isbaheysiga ay Xabashidu horkaceyso, xiligan oo ay midowga maxaakiimtu u muuqdaan quwad kasbatay kalsoonida umadda Soomaaliyeed meel ay joogaanba, warqaddii Ra’isulwasaare Geedi uu u gudbiyay beesha caalamka ee uu ugu sheegayay in aanay jirin cid wakiil ka ah dowladda KMG ah oo la xaajooneysa maxkamadaha islaamiga, iyo is casilaadii Gudoomiyaha Baarlamanka Soomaliya Shariif Xasan Sheekh Aadan uu iska casilay jagadii loo magacaabay ee aheyd wada xaajoodka Maxkamadaha iyo dowladda KMG ah.

Dhanka kale, warar hoose oo ay Allgedo ka heshay ilo lagu kalsoon yahay ayaa waxay sheegayaan in dhawaanahaanba uu wada hadal hoose u socday Col. Bare Hiiraale iyo midowga Maxaakiimta, taasoo midowga maxaakiimta ay Bare si cad ugu sheegeen in uu si weyn uga fekero ka mid noqoshaha midowga maxaakiimta ama kuwa kasoo horjeeda ee ay bah wadaagta yihiin cadowga Soomaaliyeed oo ah Dowladda FKMG. Culeyskaan siyaasadeed ee waayadaan danbe soo wajahay Col. Hiiraale ayaa waxaa usii dheer ayada oo uu horay u lumiyay inta badan kalsoonida beesha uu kasoo jeedo ee Mareexaan iyo isaga oo ay adagtahay in xiligaan uu sida Gen. Morgan dibadaha gaaf-wareegeysto.

Isku soo wada duuboo, amuurahaas aan kor kusoo sheegnay awgood ayaa waxaa laga yaabaa in ay xiligaan soo dedejisay in ay Bare Hiiraale iyo meleeshiyadiisa u ruqaansadaan Gobolada Jubooyinka si ay uga mid noqdaan Midowga Maxaakiimta ee uusan marnaba hadafkooda aheyn in ay dagaal kala hortagaan kuwa Maxaakiimta ee ku sugan deegaanada Jubbooyinka.

Ugu danbeyntii, waxaa xaqiiqo ah haddii ay dhacdo in xoogagga Barre Hiiraale ay ku biiraan kuwa Maxaakiimta in ay talaabadaasi noqon doonto guul dhinaca siyaasadda ah ee usoo hoyatay Midowga Maxaakiimta iyo dharbaaxo lama filaan ah ee ku dhacday quwadaha ay Itoobiyaanka hor kacayaan.


 

Allgedo News Media Network (ANMN)